Ходимларнинг кунлик ишга келиши ва ишга мас’улияти қатʼий тартибда назорат қилинади

Жорий йилнинг 1-август куни ижтимоий тармоқлардаги “КОМПОР УЗ” саҳифасида “Микрокредитбанк” АТБ Боғот туманидаги Боғот БХМ фаолияти бўйича танқидий мурожаат э’лон қилинди.

Мурожаатда мижозларга хизмат кўрсатишда юзага келаётган қатор муаммолар, жумладан, аҳоли банкка мурожаат қилса, жойида тегишли масʼул шахсларни топиш қийинлиги, кўпинча “ертага келинг”, “бошлиқ йўқ” каби баҳоналар билан одамларнинг овора қилинаётгани ва айрим ходимлар иш вақтида ўз шахсий бизнеслари билан бандлиги танқид қилинган.

Мазкур мурожаат шу куннинг ўзида мас’уллар томонидан ўрганилди.

Боғот банк хизматлари маркази ҳозирги кунда 2 180 та тадбиркорлик субекти ва 18 577 нафар жисмоний шахсга мунтазам, сифатли банк хизматларини кўрсатиб келмоқда. Бу вақтгача мижозлар томонидан хизматлар сифатининг пастлиги ёки ходимлар фаолияти юзасидан жиддий эʼтирозлар қайд этилмаган.

Марказда 28 нафар ходим ўз меҳнат фаолиятини белгиланган ички тартиб асосида бажармоқда. Ходимларнинг кунлик ишга келиши қатʼий тартибда назорат қилинмоқда.

Мурожаатда келтирилганидек, иш вақтида шахсий тадбиркорлик билан шуғулланадиган банк ходимлари мавжуд эмас. Бундан ташқари, бундай ҳолатларнинг олдини олиш мақсадида тегишли бўлимлар томонидан доимий мониторинг ва ички назорат тизими жорий этилган.

Шу ўринда оммавий ахборот воситалари ва блогерлардан ёлғон ва асоссиз маʼлумотлар тарқатмасликни, расмий манбалар орқали тасдиқланган маʼлумотлардан фойдаланишни сўраймиз.

Мижозларимизга эслатма. Банк хизматларидан фойдаланиш учун бугун банкимизга тегишли маҳаллаларда “Маҳалла банкири” ва маҳалла агенти фаолияти йўлга қўйилган бўлиб, сиз барча мурожаатларингизни ўзингиз истиқомат қиладиган маҳалладаги маҳалла банкирига йўллашингиз мумкин. Бу сизнинг вақтингизни ҳам тежайди, ортиқча оворагарчиликларнинг ҳам олди олинади.

Микрокредитбанк фуқаролар мурожаатларига очиқ, жамоатчилик назоратини қўллаб-қувватлайди ва ҳар бир асосли мурожаатга ўз вақтида жавоб қайтаради.

Банк Ахборот хизмати