«Mikrokreditbank» AKB Basqarma baslıǵınıń Korrupciyaǵa qarsı gúresiw hám onıń aldın alıw boyınsha jollaǵan múrájatı
MUROJAAT
Húrmetli kásiplesler!
Bizge belgili, korrupciya jámiyettiń demokratiya hám ádillik principleri ústinligine ayrıqsha zıyan jetkerip, insan huqıqlarınıń buzılıwına, qádir-qımbatınıń ayaq astı etiliwine alıp keledi jáne mámleket hám jámiyettiń rawajlanıwına tosqınlıq etip, puqaralardıń turmıs dárejesin tómenletedi.
Solay eken, korrupciyaǵa qarsı gúresiwde bank xızmetkerleri de belsendilik kórsetiwi hám korrupciyaǵa baylanıslı huqıqbuzarlıqlardıń júzege keliwine shek qoyıw, korrupciyaǵa imkaniyat beretuǵın sebepler hám sharayatlardı jaratpaw, eń tiykarǵısı bunday háreketler ushın juwapkershiliktiń sózsiz ekenligin tereń ańlawı kerek.
Bank xızmetkerleri tárepinen qarıydarlarǵa finanslıq xızmetlerdi kórsetiw procesinde dámegóylik etiw, paraxorlıq, lawazımınan paydalanıw menen baylanıslı háreketlerdiń ámelge asırılıwı qarıydarlarımızdıń bankke bolǵan isenimine hám pútkil jámáátimizge úlken zıyan jetkeredi.
Húrmetli Prezidentimizdiń sózi menen aytqanda, jámiyetimizdiń barlıq aǵzaları «hadallıq vakcinası» menen emlenbes eken, óz aldımızǵa qoyǵan joqarı sheklerge erise almaymız. Sonıń ushın bárshemiz búgingi tınıshlıq-tatıwlıq húkim súrip atırǵan elimizde ádillik principleri tiykarında hadal miynet etiwimiz zárúr hám shárt.
Haqıyqatında da, «hadallıq vakcinası» insan sanası hám qálbinde qáliplesetuǵın korrupciyaǵa qarsı jerkenish sezimi hám jedel qarsılıǵında kórinedi. Hár qanday insan sanasına «hadallıq vakcinası» jaslıǵınan sińdirip barılıwı kerek. Ol tárbiya hám bilim kórinisinde ámelge asırıladı. Demek, hár bir bank xızmetkeri óz jumısın hadal, bank xızmetlerin qalıs orınlasa, ol «hadallıq vakcinası» menen emlengen boladı.
Búgin bankimiz jumısınıń ashıq-aydınlıǵın támiyinlew hám xızmetkerlerimizdiń juwapkershiligin arttırıw, byurokratiyanı saplastırıw hám bank xızmetlerin ápiwayılastırıw, sanlastırıw arqalı insan faktorın azaytıw, korrupciyanıń aldın alıwǵa qaratılǵan hár qıylı mexanizmler ámeliyatqa keńnen engizilmekte.
Bunıń ushın álbette, ózin usı bank jámáátiniń bir aǵzası dep biletuǵın xızmetkerlerdiń hár biri bárinen burın ózi úlgi bolıp, qalaberdi jámááttegi shákirtleri hám kásipleslerine de korrupciyaǵa jol qoymaw, olarǵa imkaniyat beretuǵın sebep hám sharayatlardı saplastırıw, korrupciyaǵa baylanıslı huqıqbuzarlıqlardı islegenlik ushın juwapkershiliktiń sózsiz ekenligin túsindiriwi zárúr.
Usı jerde, men bank Basqarmasınıń Baslıǵı sıpatında bankimizde jumıs alıp barıp atırǵan 4 mıńǵa shamalas xızmetkerlerden qarıydarlarǵa xızmet kórsetiw procesinde bárinen burın, hújdanlılıq penen sapalı xızmet kórsetiwin, hár qanday jaǵdayda, hátteki joqarı turıwshı basshıları nızamsız tapsırma bergen jaǵdayda da nızam hújjetleri hám ishki normativlik hújjetler sheńberinen shıqpawın talap etemen.
Bunnan tısqarı, elimizde kámbaǵallıqtı qısqartıw hám xalıqtıń bántligin támiyinlew boyınsha ámelge asırılıp atırǵan reformalar nátiyjesinde bankimizde 1 121 máhállege jańa sistema tiykarında 332 «máhálle bankiri» shtat birligi ashıldı hám 1121 járdemshi-agentler jallandı.
Bul xızmetkerlerden de óz jumısında nızam buzılıwı hám korrupciya jaǵdaylarına jol qoymawın, xızmet wazıypaların hújdanlı túrde orınlawın hám hár bir jumısımızǵa juwapkershilik penen qatnas jasawın sorayman.
Áziz kásiplesler!
Mámleketimiz basshısı tárepinen bizge úlken isenim bildirilip, isbilermenlikti rawajlandırıw, jańa jumıs orınların shólkemlestiriw, xalıqtı kámbaǵallıqtan shıǵarıw sıyaqlı áhmiyetli wazıypalar tapsırılǵan. Bul jumıslardı orınlaw ushın hadallıq hám pidayılıq, watandı súyiw, isbilermenler hám xalıqtı qıynap atırǵan máselelerge nızamlı sheshimler tabıw arqalı hár tárepleme járdem beriw talap etiledi.
Múrájatımnıń juwmaǵında tarawda miynet etip atırǵan xızmetkerlerden sistemada korrupsiyalıq jaǵdaylar baqlanǵanda yamasa gúman tuwdıratuǵın hám nızamsız jaǵdaylar júz bergende, baylanıs kanallarımız arqalı múrájat etiwin sorayman.
Itibarıńız ushın raxmet!
Arif Butaev,
«Mikrokreditbank» AKB Basqarma baslıǵı.
