“Микрокредитбанк”АТБ Бошқарув Раисининг Коррупция ҳолатларини олдини олиш ва бу борада тизимли курашиш юзасидан банк ходимларига йўллаган
МУРОЖААТИ
Ҳурматли ҳамкасблар!
Маълумки, коррупция жамиятнинг демократия ва адолат тамойиллари устуворлигига жиддий путур етказиб, инсон ҳуқуқлари бузилишига, қадр-қиммати топталишига олиб келади ҳамда давлат ва жамият тараққиётига тўсқинлик қилиб, фуқаролар турмуш даражасини ёмонлаштиради.
Шундай экан, коррупцияга қарши курашишда банк ходимлари ҳам фаоллик кўрсатишлари ва коррупцияга оид ҳуқуқбузарликларни юзага келишига чек қўйиш, коррупцияга имкон берувчи сабаблар ва шарт-шароитларни яратмаслик, энг асосийси бундай ҳаракатлар учун жавобгарликнинг муқаррарлигини чуқур англамоғи лозим.
Банк ходимлари томонидан мижозларга молиявий хизматларни кўрсатиш жараёнидаги таъмагирлик қилишлари, порахўрлик, мансаб мавқеини суиистеъмол қилиш билан боғлиқ харакатларнинг содир этилиши мижозларимизнинг банкка бўлган ишончига ва бутун жамоамизга жиддий путур етказади.
Муҳтарам Президентимиз таъбири билан айтганда, жамиятимизнинг барча аъзолари “ҳалоллик вакцинаси” билан эмланмас экан, ўз олдимизга қўйган юксак марраларга эриша олмаймиз. Шунинг учун барчамиз бугунги тинчлик-осойишталик ҳукм сурган юртимизда адолат тамойиллари асосида ҳалол меҳнат қилишимиз зарур ва шарт.
Дарҳақиқат, “ҳалоллик вакцинаси” инсон онги ва қалбида шаклланадиган коррупцияга қарши нафрат туйғуси ва фаол қаршилигида намоён бўлади. Ҳар қандай инсон онгига “ҳалоллик вакцинаси” ёшлигидан сингдириб боpилмоғи лозим. У тарбия ва таълим кўринишида амалга оширилади. Демак, ҳар бир банк ходими ўз ишини ҳалол, банк хизматларини холис бажарса, у “ҳалоллик вакцинаси” билан эмланган бўлади.
Бугун банкимиз фаолиятининг очиқ ва ошкоралигини таъминлаш ҳамда ходимларимиз масъулиятини ошириш, бюрократияга чек қўйиш ва банк хизматларини соддалаштириш, рақамлаштириш орқали инсон омилини камайтириш, коррупциянинг олдини олишга қаратилган турли механизмлар амалиётга кенг жорий этилмоқда.
Бунинг учун албатта, ўзини шу банк жамоасининг бир аъзосиман деб билган ходимларнинг ҳар бири аввало ўзи намуна бўлиб, қолаверса жамоадаги шогирдлари ва ҳамкасбларига ҳам коррупцияга йўл қўймаслик, уларга имкон берувчи сабаб ва шарт-шароитларни бартараф этиш, коррупцияга оид ҳуқуқбузарликларни содир этганлик учун жавобгарликнинг муқаррарлигини тушунтирмоғи лозим.
Шу ўринда, мен банк Бошқаруви Раиси сифатида банкимизда фаолият олиб бораётган 4 мингга яқин ходимлардан мижозларга хизмат кўрсатиш жараёнида энг аввало, виждонан, ҳалоллик билан сифатли хизмат кўрсатишларини, ҳар қандай вазиятда ҳаттоки юқори турувчи раҳбарлари ноқонуний топшириқ берган тақдирда ҳам қонун ҳужжатлари ва ички меъйёрий ҳужжатлар доирасидан четга чиқмасликларини талаб қиламан.
Қолаверса, юртимизда камбағалликни қисқартириш ва аҳоли бандлигини таъминлаш юзасидан амалга оширилаётган ислоҳотлар натижасида банкимизда 1 121 та маҳаллага янги тизим асосида 332 та “маҳалла банкири” штат бирлиги очилди ҳамда 1121 нафар ёрдамчи-агентлар ёлланди.
Ушбу ходимлардан ҳам ўз иш фаолиятида қонун бузилиш ва коррупцион ҳолатларига йўл қўймасликларини, хизмат вазифаларини виждонан бажаришларини ва ҳар бир ишимизга масъулият билан ёндошишларини сўрайман.
Азиз ҳамкасблар!
Юртбошимиз томонидан бизга катта ишонч билдирилиб, тадбиркорликни ривожлантириш, янги иш ўринлари ташкил этиш, аҳолини камбағалликдан чиқариш каби муҳим вазифалар топширилган. Ушбу ишларни бажариш учун ҳалол ва фидойилик, ватанни севиш тадбиркорлар ва аҳолини қийнаётган масалаларга қонуний ечимлар топиш орқали ҳар томонлама кўмак бериш талаб қилинади.
Мурожаатим якунида соҳада меҳнат қилаётган ходимлардан тизимда коррупцион ҳолатлар кузатилганда ёки шубҳа туғдирувчи ва ноқонуний ҳолатлар юз берганида, алоқа каналларимиз орқали мурожаат қилишларини сўрайман.
Эътиборингиз учун раҳмат!
Ориф Бутаев,
“Микрокредитбанк” АТБ Бошқарув раиси.
