“Mikrokreditbank”ATB Boshqaruv raisining Korrupsiya holatlarini oldini olish va bu borada tizimli kurashish yuzasidan yoʻllagan MUROJAATI
Hurmatli mijozlar, hamkorlar, aksiyadorlar va hamkasblar!
Mikrokreditbank tizimida korrupsiyaning oldini olishga qaratilgan barcha zaruriy choralarni koʻrish, ularni keltirib chiqarishi mumkin boʻlgan sabab va shart-sharoitlarni barvaqt aniqlash hamda bartaraf etish boʻyicha samarali tizim yaratishga qaratilgan keng koʻlamli ishlarimizni bu yil ham izchillik bilan amalga oshirishga jiddiy bel bogʻlaganmiz.
Korrupsiya – jamiyat taraqqiyotiga toʻsiq boʻlayotgan eng xavfli illat. Shu bois korrupsiyaga qarshi kurash dunyo hamjamiyati oldida turgan eng dolzarb masalalardan biriga aylangan.
Mamlakatimizda korrupsiyaning oldini olish va unga qarshi kurashish, jamiyatning barcha sohalarida korrupsion holatlarni keltirib chiqaruvchi omillarga chek qoʻyishga yoʻnaltirilgan keng koʻlamli islohotlar olib borilmoqda. Mikrokreditbank tomonidan ushbu islohotlar doirasida qator chora-tadbirlar amalga oshirilmoqda. Xususan, oʻtgan davrda bu borada korrupsiyaga qarshi kurashish boʻyicha alohida tuzilma tashkil etilib, aniq vazifalar belgilab berildi.
Taʼkidlashim kerakki, Mikrokreditbankda korrupsiyaning oldini olish choralarini koʻrish, uni keltirib chiqarishi mumkin boʻlgan sabab va shart-sharoitlarni barvaqt aniqlash hamda bartaraf etish, korrupsiyaga qarshi murosasiz muhitni shakllantirish borasidagi ishlar uzluksiz va izchillik bilan davom ettiriladi.
Muhtaram Prezidentimiz taʼbiri bilan aytganda, jamiyatimizning barcha aʼzolari “halollik vaksinasi” bilan emlanmas ekan, oʻz oldimizga qoʻygan yuksak marralarga erisha olmaymiz. Shuning uchun barchamiz bugungi tinchlik-osoyishtalik hukm surgan yurtimizda adolat tamoyillari asosida halol mehnat qilishimiz zarur va shart.
Oʻz navbatida, Mikrokreditbankda mehnat qilayotgan har bir rahbar va xodimni korrupsiya holatlarining har qanday koʻrinishlariga nisbatan murosasiz munosabatda boʻlishga hamda oʻz xizmat vazifalarini halol va xolis bajarishga yana bir bor chaqiraman.
Men mazkur murojaatim bilan yana Siz aziz mijozlarimizni MKBANK tizimida korrupsion holatlar kuzatilganda yoki shubha tugʻdiruvchi va noqonuniy holatlar yuz berganida aloqa kanallarimiz orqali murojaat qilishga chorlab qolaman.
Bu borada Sizning hamkorligingiz va qoʻllab-quvvatlashingiz muhim ahamiyatga ega, biz esa faoliyatimizning barcha jabhalarida halollik va javobgarlikning eng yuqori standartlarini qoʻllab-quvvatlashga intilamiz.
Hurmat bilan,
Butayev Orif Aliboyevich
“Mikrokreditbank” ATB Boshqaruv raisi
