"Ózbekstan Respublikası Mámleketlik gerbi haqqında"ǵı Nızam 1992-jıl 2-iyulde Ózbekstan Respublikası Joqarǵı Keńesiniń X sessiyasında qabıl etilgen.
Ózbekstan Respublikasınıń Mámleketlik gerbi gúllegen oypatlıq ústinde jarqırap turǵan quyashtıń kórinisinen hám shep tárepinde biyday masaqları, oń tárepinde ashılǵan paxta shanaqlarınıń súwreti túsirilgen sheńberden ibarat.
Gerbtiń joqarı bóliminde respublika birliginiń belgisi sıpatında segiz qırlı juldız súwretlengen: segiz qır ishinde jaylasqan yarım ay hám juldız musılmanlardıń qutlı belgisi bolıp tabıladı.
Gerbtiń orayında mártlik, ullılıq hám pidayılıq tımsalı bolǵan ápsanalıq Xumo qusı qanatların jayıp tur. Bul timsallar xalqımızdıń tınıshlıq, jaqsılıq, baxıt-ıǵbal, abadanlıq jolındaǵı arzıw-nietlerin sáwlelendiredi.
Gerbtiń tómengi bóliminde respublika Mámleketlik bayraǵın sáwlelendiriwshi sheńber lentasınıń bántine "Ózbekstan" dep jazıp qoyılǵan.
