Хоразм халқ меъморлигининг дурдона намуналарини ўзида мужассам этган Ичан қалъа — Шарқнинг экзотик шаҳри тимсоли сифатида эътироф этилади ва у Марказий Осиёдаги биринчи жаҳон мероси ҳисобланади. Ичан қалъага ташриф буюрсангиз, нафақат ундаги меъморий обидаларнинг жозибасидан, балки Хоразмнинг ўзига хос урф-одат, анъаналари, миллий ҳунармандчилик намуналаридан ҳам баҳраманд бўласиз. Хоразмлик ҳунармандлар орасида хотин-қизларнинг ҳам ўз ўрни бор. 
Aнжела Давлетова узоқ йиллардан буён миллий либослар дизайни билан шуғулланади. У яратаётган либослар ўзининг замонавийлиги ва бетакрорлиги, ўзбек миллий маданиятини ўзида акс эттиргани билан аҳамиятли, шу боисдан ҳам унинг харидорлари жуда кўп. Aнжеланинг фаолияти “Микрокередитбанк” AТБ томонидан қўллаб-қувватлаб келинмоқда. 2022 йилда унга тикувчилик йўналиши учун 120 миллион сўм миқдорда имтиёзли кредитлар ажратилган эди. Бу маблағларга замонавий тикув дастгоҳлари харид қилиб, фаолиятини янада кенгайтиришга муваффақ бўлди. 
- Мен тадбиркорлар оиласига келин бўлганман. Қайнотам, қайнонам, турмуш ўртоғим ва бошқа оиламиз аъзолари хизмат кўрсатиш соҳасида фаолият олиб боришади. Мен ҳам ўзим қизиққан дизайнерлик йўналишида ишламоқчилигимни билдирганимда, улар мени қўллаб-қувватлади. Тикув цехи ташкил қилишда эса банкнинг кўмагига таянганман. Микрокредитбанкдан уч маротаба имтиёзли кредит олиб ўз фаолиятимни кенгайтирганман. Бугунги кунда биз яратаётган либослар ҳам маҳаллий, ҳам хорижий сайёҳларнинг эътиборида. Шунингдек, бу масканда устоз-шогирд анъаналари асосида ҳам иш олиб боряпмиз. Цехимизда 20 нафар ишчи бор. Уларнинг барчаси шогирдларим, — дейди у. 
Aнжела Давлетова томонидан “Tilla dukart fashion school” бренди остида яратилаётган либослар қатор танлов ва фестивалларда намойиш этиб келинади. Яқинда Хива шаҳрида ўтказилган “1000 та ҳунарманд фестивали ва либосларда миллий ҳамда анъанавий қадриятлар уйғунлиги” шиори остидаги миллий модалар намойишида ҳам иштирок этиб, фахрли ўринни эгаллади.
Хоразмда Aнжела каби ҳунармандчилик ортидан обрў-еътибор қозонаётган, яхшигина даромадга эга бўлаётган хотин-қизлар кўплаб топилади. Калта минор маҳалласи, Шоҳимардон кўчасида мўжазгина бир ҳовли бор. 
Бу ерда ҳунармандчиликнинг энг қадимий турларидан бири бўлган кулолчилик билан шуғулланаётган Дилноза Отажонова фаолиятига гувоҳ бўлиш мумкин. У айни пайтда Хива шаҳар тадбиркор аёллар уюшмаси раҳбари сифатида ҳам фаолият олиб бормоқда. “Aёллар дафтари”даги ишсиз хотин-қизларнинг бандлигини таъминлаш, уларни касаначиликка жалб етишда Дилнозанинг ҳиссаси катта.
- 100 нафардан ортиқ шогирдим бор, - дейди у биз билан суҳбатда. – Фаолиятимни 2007-йилда бошлаганман. Кулолчилик менга қайнота касб. Ўз фаолиятимни самарали давом эттириш учун Микрокредитбанкнинг имтиёзли кредитларидан фойдаланиб келмоқдаман. Биринчи бор 33 миллион сўм, иккинчи маротаба 100 миллион сўм миқдорда кредит олиб, лой қорадиган ускуна ва печлар харид қилганман. Маҳсулотларимизнинг асосий харидорлари хорижий сайёҳлардир. Қўл меҳнати билан яратилаётган намуналар уларни доимо ҳайратлантиради. Мақсадим, ўзим каби кулол аёллар сафи кенгайса дейман. Бунинг учун доимий равишда маҳорат дарслари ўтказиб тураман, шу билан бирга хотин-қизларимизга кулолчилик сирларини ўргатиш учун ҳам алоҳида ўқув курслари ташкил қилганман. 
Юртимизда хотин-қизларнинг ҳуқуқ-манфаатларини қонуний ҳимоя қилиш, улар учун янги иш ўринлари яратиш, касб-ҳунарга ўргатиш, хотин-қизлар тадбиркорлигини ривожлантириш, турмуш шароитларини яхшилаш давлат сиёсатининг устувор йўналишига айланди. Микрокредитбанк томонидан ҳам айнан хотин-қизлар тадбиркорлигини молиявий қўллаб-қувватлаш, улар фаолиятини ривожлантиришга ҳисса қўшишга алоҳида эътибор қаратилмоқда. 
Рақамларга тўхталадиган бўлсак, 2024 йил 21 октабрь ҳолатига 110 мингдан ортиқ аҳоли ва тадбиркорлик субъектларига имтиёзли шартларда жами 1 848 млрд. сўм кредитлар ажратилиши натижасида 110 463 нафар аҳоли бандлиги таъминланди.
Мазкур дастур доирасида ажратилган кредитларнинг 38 фоизи ёшлар ҳиссасига 51 фоизи эса айнан хотин-қизларнинг ҳиссасига тўғри келади.
Aсли аёл нафақат оила равнақи ҳамда фарзандлар тарбияси билан машғул она ва уй бекаси бўлиши, балки жамият ҳаётида ҳам ўз ўрнига эга бўлиши, турли соҳаларда юксак муваффақиятларга еришиши мумкин. Aнжела ва Дилноза каби ҳунарманд опа-сингилларимиз сафи кенгаяверсин.
Банк Aхборот хизмати
