“Микрокредитбанк” АТБ ходимлари Буюк Британияда ташкил этилган халқаро ўқув семинарида иштирок этди. Банк тизимида ажратилган кредитлар самарадорлигини баҳолаш ҳамда молиялаштиришдан кейинги мониторинг жараёнида эрта огоҳлантириш тизимини жорий этиш бугунги кунда банк тизимининг устувор йўналишларидан бири ҳисобланади. Мазкур йўналишда халқаро стандартлар ва илғор тажрибаларни ўрганиш, шунингдек, замонавий ахборот технологияларини амалиётга татбиқ этиш муҳим аҳамият касб этмоқда.
Шу муносабат билан, халқаро миқёсда ўқув дастурларини ташкил этишга ихтисослашган МБФ Академияси томонидан Буюк Британияда жорий йилнинг 6-17- июнь кунлари "Кредит қайтарилиши, унинг самарадорлиги ва эҳтимолий хавфларини эрта аниқлаш масалалари" ҳамда 21–30 июнь кунлари “Ажратилган кредитлар самарадорлигини баҳолаш ва молиялаштиришдан кейинги мониторингни жорий этиш” мавзусидаги халқаро ўқув семинарларда МКБАНК ходимлари фаол иштирок этди.
Дастур интерактив машғулотлар, амалий муҳокамалар, давра суҳбатлари ҳамда Оксфорд университети, Лондон молиявий маркази ва Эдинбургга ташрифларни ўз ичига олди. Сертификатлар билан тақдирлаш маросими Ўзбекистоннинг Лондондаги Элчихонасида бўлиб ўтди.
Иштирокчилар Британиянинг илғор тажрибасини ўрганиб, уни Ўзбекистон молия соҳасида қўллаш бўйича амалий билимларга эга бўлдилар. Ушбу билим ва тажриба мамлакатимиз молия сектори ривожига муносиб ҳисса қўшишига ишонамиз.
Банк Ахборот хизмати
Яна кўринг
MKB Premium Plus — бизнес учун қулайликлар бир пакетда
МКБАНКда Ria халқаро пул ўтказмаларини еврода олиш имконияти яратилди
МКБАНК ходими нуфузли мусобақада 4-ўринни эгаллади!
Мазкур мусобақада барча вазирлик ва идораларнинг 120 нафардан ортиқ ходимлари ФИДЕ қоидалари асосида баҳслашди.
