Samarqandlik bitiruvchilarga imtiyozli kreditlar ajratildi

O‘zbekiston Respublikasi Markaziy banki tomonidan mutasaddi idoralar hamkorligida tadbirkor va endigina hayotga qadam qo‘yayotgan yoshlarimizning biznes g‘oyalarini hayotga tadbiq etish va biznes rejalarini imtiyozli shartlarda moliyalashtirish, ularning bandligini ta’minlashga ko‘maklashishga qaratilgan qator chora-tadbirlar amalga oshirilib kelinmoqda.

“Sog‘lom bola yili” Davlat dasturi hamda mamlakatimiz rahbarining “O‘zbekiston Respublikasida yoshlarga oid davlat siyosatini amalga oshirishga qaratilgan qo‘shimcha chora-tadbirlar to‘g‘risida”gi qarorini amalga tadbiq etish doirasida Markaziy bankning Samarqand viloyat Bosh boshqarmasi, viloyat prokuraturasi, viloyat O‘rta maxsus kasb-hunar ta’limi boshqarmasi hamda tijorat banklarining viloyatdagi filiallari tomonidan ta’lim muassasalari bitiruvchilarini bandligini ta’minlash, ularning tadbirkorlik faoliyatlarini boshlashlari uchun tijorat banklari kreditlaridan foydalanishlari bo‘yicha yaratilgan imkoniyatlar va imtiyozlarni yana bir bor ommalashtirishga bag‘ishlangan amaliy seminarlar viloyatning Payariq va Paxtachi tumanlarida bo‘lib o‘tdi.

Qayd etildiki, tadbirkorlik uchun yaratilayotgan qulay ishbilarmonlik muhiti joylarda fuqarolarning o‘z biznesini tashkil etish va rivojlantirishga bo‘lgan qiziqishini keskin orttirmoqda.

Aniq raqamlarga to‘xtaladigan bo‘lsak, joriy yilning o‘tgan 5 oyi davomida Samarqand viloyatda kichik biznes va xususiy tadbirkorlik sub’ektlariga ajratilgan kreditlarning hajmi o‘tgan yilning mos davriga nisbatan 1,3 barobar ortib, 289,6 mlrd. so‘mni tashkil etdi.

Ta’kidlandiki, yoshlarni, ayniqsa kasb-hunar kollejlari bitiruvchilarini tadbirkorlik faoliyatiga keng jalb etish orqali ularning bandligini ta’minlash, ularga imtiyozli mikrokreditlar ajratishni kengaytirish borasida ko‘rilayotgan chora-tadbirlar ayni vaqtda o‘zining ijobiy samaralarini bermoqda.

Payarik tumanida bo‘lib o‘tgan amaliy seminarda 400 ga yaqin yosh tadbirkorlarga 2,2 mlrd so‘mlik, Paxtachi tumanida esa 200 ga yaqin 900,0 mln so‘mlik kreditlar ajratilishi bo‘yicha sertifikatlar topshirildi.