- Tadbirkor va shijoatli ayolning "Urganji" mahallasida qilgan ishlari menga juda ma’qul bo‘ldi. Shuning uchun "Mikrokreditbank" bu tadbirkor singlimizga 5 milliard so‘m miqdorida foizsiz kredit ajratadi, - dedi Prezident, Andijon viloyatiga qilgan safarida.

Parrandachilik bilan shug‘ullanuvchi andijonlik Umidaxon Usmonova oʼz xonadonida yetarli sharoit yoʼqligiga qaramasdan, uyining mehmonxonasida parranda boqib, aholiga tarqatib kelmoqda. U bugungacha 23 ming bosh xonaki tovuq tarqatgan.

"Hozir Sizlarning koʼz oldingizda Umidaxon singlimga „Mehnat shuhrati“ ordeni topshiraman", — dedi Prezident.

17-iyun kuni Shavkat Mirziyoyev Izboskan tumanidagi “Urganji” mahallasida Qurbonali O‘rinboyev xonadonida bo‘lgan edi. Ayni shu xonadonda davlat rahbari Umida Usmonovani mukofotlashi haqida aytgan.

“Men sizdan minnatdorman. Men sizga ‘Mehnat shuhrati’ ordenini beraman. Xonadonda shunday harakat qilib, o‘zbek ayoli shunday mehnat qilgan bo‘lsa, mening islohotlarim amalga oshyapti, men baxtiyorman. Sizning timsolingiz elga yarashadi. Sizning timsolingiz xalqimizga namuna bo‘ladi”, — degan Prezident.

Shavkat Mirziyoyev hududlardagi o‘zgarishlar, aholi hayoti bilan yaqindan tanishish maqsadida 17-iyundan buyon Andijon viloyatida bo‘lib turibdi.

Eslatib o'tamiz, joriy yilning 14 iyun kuni O‘zbekiston Respublikasi Prezidentining "Parrandachilikni rivojlantirish va tarmoq ozuqa bazasini mustahkamlashga qaratilgan qo‘shimcha chora-tadbirlar to‘g‘risida"gi qaroriga binoan "Mikokreditbank" parrandachilik tarmog'ini moliyalashtirishga mas'ul etib belgilandi.