Банк томонидан молиялаштирилаётган лойиҳалар кўп, бироқ уларнинг барчаси ҳам кўзланган бизнес режа кўрсаткичларига эриша олмайди. Бунда ташқи ва ички омиллар, зарур қўшимча кўмак зарур бўлиши мумкин. Шундан келиб чиқиб, банк мутасаддилари жойларда бўлиб, лойиҳалар билан яқиндан танишмоқда.
Бухоро вилояти Ромитан туманидаги "Ром-Стар" Ўзбекистон-Америка-Россия қўшма корхонаси пиллачилик соҳасини замонавий асосда ривожлантираётган йирик корхоналардан бири ҳисобланади. Корхонани молиялаштириш мақсадида “Микрокредитбанк” АТБ Бухоро БХО томонидан жами 66 миллиард сўм кредит маблағлари ажратилган.
Ушбу маблағлар ҳисобидан замонавий ишлаб чиқариш қувватлари ишга туширилиб, бугунги кунда 150 нафар фуқаро доимий иш билан таъминланди. Шунингдек, корхона ҳузурида 350 нафар тингловчига мўлжалланган замонавий пиллачилик ўқув маркази ташкил этилган бўлиб, бу ерда соҳа учун малакали мутахассислар тайёрланмоқда.
Корхонада ишлаб чиқарилган юқори сифатли пилла маҳсулотлари халқаро талабларга мос равишда қайта ишланиб, Хитой Халқ Республикасига экспорт қилинмоқда. Корхонанинг йиллик экспорт ҳажми 3 миллион АҚШ долларини ташкил этади. Бу эса нафақат корхонанинг экспорт салоҳиятини, балки Бухоро вилояти ва мамлакатимиз экспорт кўрсаткичларини оширишга ҳам муносиб ҳисса қўшмоқда.
Энг муҳими, ушбу лойиҳа янги иш ўринларини яратиш, аҳоли бандлигини таъминлаш, пиллачилик соҳасини ривожлантириш ва ҳудуд иқтисодий тараққиётини жадаллаштиришга хизмат қилмоқда. Микрокредитбанк томонидан амалга оширилаётган молиявий қўллаб-қувватлаш натижасида бундай истиқболли лойиҳалар сони тобора ортиб бормоқда.
Яқинда ушбу корхонада банкнинг вилоятдаги мутасаддилари бўлиб, корхонанинг ипак толасидан Туркия технологияси ёрдами гилам ишлаб чиқариш лойиҳаси билан танишишди. Келгусида мазкур лойиҳани ҳам банк молиявий кўмагида амалга оширишга келишиб олинди.
“SIYOVUSH TEKSTIL BUXORO” МЧЖ корхонаси ҳам ҳудуддаги йирик ишлаб чиқариш лойиҳаларидан бири ҳисобланади. Корхона томонидан амалга оширилаётган инвестиция лойиҳаси ҳудудда саноатни ривожлантириш, янги иш ўринларини яратиш ҳамда экспорт салоҳиятини оширишга хизмат қилмоқда.
Мазкур корхона фаолияти хомашё етишмаслиги сабаб, тухтаб қолган эди. Банкнинг молиявий ёрдамида ишлаб чиқариш фаолиятини узлуксиз ташкил этиш ҳамда айланма маблағларини тўлдириш мақсадида 3 млн АҚШ доллари миқдорида қўшимча кредит маблағи ажратилди.
Ажратилган айланма маблағ кредити ҳисобидан Туркия Республикасидан ишлаб чиқариш учун зарур бўлган хомашё маҳсулотлар харид қилинди. Ҳозирги кунга қадар корхонага 30 та юк автомашинаси (фура) орқали маҳсулот олиб келинди.
Корхонанинг асосий фаолияти замонавий технологиялар асосида акрил калава иплари ишлаб чиқаришдан иборат. Ишлаб чиқариладиган маҳсулотлар ички бозор билан бир қаторда Туркия, Россия ҳамда бошқа хорижий давлатларга экспорт қилинади. Бу эса корхонанинг экспорт ҳажмини ошириш, валюта тушумларини кўпайтириш ҳамда мамлакатимиз тўқимачилик саноати ривожига муносиб ҳисса қўшишига хизмат қилади.
Лойиҳа доирасида 150 та янги доимий иш ўрни яратилган бўлиб, ҳудуд аҳолисини барқарор иш билан таъминлаш ва уларнинг даромадларини оширишга хизмат қилмоқда.
Ўрганиш давомида ушбу корхонанинг тўлиқ қувватда ишга туширилиши ҳамда банк кредити эвазига қўшимча буяш цехи фаолиятини ҳам йўлга қўйишга келишиб олинди. Натижада ишлаб чиқариш ҳажми босқичма-босқич ошиб, экспорт географияси кенгаяди ҳамда янги бозорлар ўзлаштирилади.
Банк Ахборот хизмати
Яна кўринг
Тарихий лаҳзани ифодаловчи эсдалик тангалари МКБАНКда сотувда
Қирғизистонга пул юбориш энди янада осон!
