2024 йил 26 февраль Ўзбекистон қишлоқ хўжалиги соҳасини ривожлантириш йўлида муҳим қадам бўлди. Халқаро тараққиёт уюшмаси ҳамда Халқаро тикланиш ва тараққиёт банки иштирокида Ўзбекистон Республикаси Иқтисодиёт ва молия вазирлиги, Ўзбекистон Республикаси Қишлоқ хўжалиги вазирлиги ҳамда «Микрокредитбанк» АТБ ўртасида 50 миллион АҚШ доллари миқдоридаги маблағларни чорвачилик соҳасини ривожлантириш учун жалб қилиш бўйича қайта кредитлаш битими имзоланди.
Ушбу шартнома «Чорвачилик соҳасини ривожлантириш (2-босқич)» истиқболли лойиҳаси асосида тузилган бўлиб, мамлакатимиз қишлоқ хўжалиги соҳасида сезиларли яхшиланишларга сабаб бўлиши кутилмоқда. Битим доирасида чорвачилик соҳасига оид барча йўналишларда, жумладан, сут ва гўшт маҳсулотларини ишлаб чиқариш билан бир қаторда, уларни қайта ишлаш билан боғлиқ йўналишларда ҳам кредит ва инвестициялар ажратиш кўзда тутилмоқда.
Энг муҳими, ушбу лойиҳа асосида кредитлаш маълум бир минтақа билан чегараланиб қолмайди, балки республикамизнинг барча ҳудудларида соҳага йўналтирилади. Бундай инклюзив ёндашув бутун мамлакат бўйлаб иқтисодий барқарорлик ва фаол бизнесни рағбатлантиришга кўмаклашади.
Бундан ташқари, мазкур битим лойиҳалар учун маблағларнинг ажратилиши молиявий хизматлардан фойдаланиш имкониятларини кенгайтиришга қаратилган стратегик эътиборни ифодалайди. Чорвачилик билан шуғулланувчи корхоналар, шунингдек, ушбу соҳага киришни режалаштирган ишбилармонлар ўз бизнесларини бошлашларида муҳим аҳамият касб этиши кутилмоқда.
Чорвачиликни ривожлантириш орқали мамлакатимиз нафақат озиқ-овқат хавфсизлигини мустаҳкамлайди, балки иқтисодиётни диверсификация қилиш ва қишлоқларнинг турмуш тарзини ҳам янги босқичга кўтаради.
Маълумот учун, Президентимиз Шавкат Мирзиёевнинг 2023 йил 5 июлдаги ПҚ-211-сонли қарорига мувофиқ, келишув чорвачиликни ривожлантириш учун 50 миллион АҚШ долларини жалб этишни назарда тутади.
Банк Ахборот хизмати
Яна кўринг
Техник созлаш ишлари амалга оширилади!
МКБАНКда "Қадринг баланд бўлсин, Она тилим!" шиори остида Оммавий диктант танлови ўтказилди
