Қишлоқ хўжалигида самарадорликни ошириш, аҳолини иш билан та‘минлаш ва қишлоқ аҳолиси даромадини кўпайтириш мақсадида “Бир контур – бир маҳсулот” тамойили асосида амалга оширилаётган лойиҳалар мамлакатимизда ижобий натижалар бермоқда.
Деҳқон хўжаликларига ижарага берилган 1 747 гектар ер майдонида намунали лойиҳаларни амалга ошириш учун “Микрокредитбанк” АТБ томонидан 159 та агрегатор танлаб олинди. Ушбу агрегаторлар томонидан жорий йилда мазкур майдонларда биринчи экинда полиз ва мева-сабзавот экинлари етиштириш учун 4,7 миллиард сўм кредитга талаб аниқланиб, дастлабки босқичларда 2,2 миллиард сўм имтиёзли кредит ажратилди.
Сурхондарё вилояти Ангор тумани “Илғор” маҳалласидан ёшларга ижарага берилган 15 гектар ер майдонида карам экилди. Экин етиштириш “Ризқ Барака Кайран” корхонаси ва ер эгалари ўртасида фьючерс шартномалари асосида амалга оширилмоқда. Дастлабки ҳисоб-китобларга кўра, ҳар бир ёш йиллик 50 миллион сўм атрофида даромад олиши режалаштирилган.
Шунингдек, “Супер лойиҳа” доирасида “етиштириш – қайта ишлаш – сотиш” занжирини яратиш мақсадида 6 та вилоятдаги 232 нафар фуқарога ижарага берилган 100,4 гектар ер майдонида 7 та намунавий лойиҳа шакллантирилиб, тегишли техник-иқтисодий асослар ишлаб чиқилди ва туман ҳокимликлари томонидан тасдиқланди.
Бухоро вилояти Пешку тумани “Садир” маҳалла фуқаролар йиғинида 50 нафар фуқарога (20 сотихдан) ижарага берилган 10 гектар ер майдонида 1,5 миллиард сўм имтиёзли кредит ҳисобига иссиқхона ташкил этилди. “Нодирабегим Шахзодбек Шохижахон” агрегатор корхонаси бошчилигида помидор маҳсулоти экилди. Ҳар бир кооператив аъзоси йиллик 70–80 миллион сўм миқдорида даромад олиши кутилмоқда.
Ҳозирга қадар 6 та лойиҳа бўйича 84,4 гектар ер майдонида Бухоро вилояти Пешку туманида помидор, Ромитан туманида бақлажон, Наманган вилояти Поп туманида тарвуз, Самарқанд вилояти Нарпай туманида сабзи ҳамда Сурхондарё вилояти Ангор туманида қовун ва тарвуз экинлари экилиб, айни пайтда ҳосил йиғилмоқда. Қолган 1 та лойиҳа бўйича Тошкент вилояти Оққўрғон туманидаги 15 гектар ер майдонида июль ойида ловия экиш тўлиқ таъминланади.
“Микрокредитбанк” томонидан тадбиркорликни қўллаб-қувватлаш, янги иш ўринлари яратиш ва аҳолини арзон қишлоқ хўжалиги маҳсулотлари билан таъминлашга қаратилган ишлар изчил давом эттирилади.
Банк ахборот хизмати.
Яна кўринг
