“Микрокредитбанк” АТБ Бошқарув раиси ўринбосари Шахло Ибрагимова Бухоро вилоятига хизмат сафари давомида Қоракўл туманида бўлиб, Жиғачи маҳалласининг истиқболли ташаббусларидан бири – “Ҳасанобод шифо бол” фермер хўжалигининг кооперация асосидаги лойиҳаси билан танишди. Мазкур ташаббус доирасида аҳоли хонадонларига асалари уялари тарқатилиб, улар орқали бандлик ва даромад манбаи яратилаётгани диққатга сазовор.
Фермер хўжалик раҳбари Ғайрат Искандаров ушбу лойиҳани 2024-йилда Микрокредитбанкнинг 680 миллион сўмлик кредити ёрдамида бошлаган. Жорий йилда банк томонидан яна 300 миллион сўмлик кредит ажратилиб, лойиҳа доирасида 20 та кам таʼминланган оилага асаларилар уялари тарқатилди. Фермернинг айтишича, умумий ҳисобда 100 та оилани қамраб олиш кўзда тутилган.
Та’кидлаш керакки, бугунги кунда асал етиштирган оилаларнинг маҳсулотлари фермер хўжалиги томонидан сотиб олиниб, қадоқланади ва ички бозорга чиқарилади. Шунингдек, Шахло Ибрагимова маҳаллада асалариларни парваришлаётган хотин-қизлар билан ҳам мулоқот қилди. Улар ўз фаолияти ҳақида сўзларкан, бундай лойиҳалар орқали оила буджетига ҳисса қўшаётганини қувонч билан таʼкидлашди.
Асаларичилик кўп меҳнат ва масʼулият талаб қилса-да, уни оила шароитида амалга ошириш мумкинлиги боис, хотин-қизлар учун жуда қулай. Ушбу лойиҳалар уларнинг тадбиркорлик салоҳиятини ривожлантириш, ўз ишини ташкил қилиш ва молиявий мустақилликка эришишида муҳим қадам ҳисобланади.
Банк Ахборот хизмати
Яна кўринг
Тарихий лаҳзани ифодаловчи эсдалик тангалари МКБАНКда сотувда
Кредитдан натижагача: Бухоролик тадбиркорларнинг муваффақият йўли
