“Микрокредитбанк” АТБ томонидан банк молиявий кўмагида ўз тадбиркорлик фаолиятини бошлаб, уни самарали давом эттираётган тадбиркорлар талайгина. Ана шундай лойиҳаларни кенг жамоатчиликка таништириш мақсадида 28-октябрь куни Бухоро вилоятида пресс-тур ташкил этилди. Унда респуплика ҳамда маҳаллий ОАВ вакиллари иштирок этди.
Журналистлар дастлаб Бухоро шаҳридаги “ALFA MEDICAL CENTER” хусусий клиникаси фаолияти билан танишди.
Бу ерда аҳолига барча турдаги тиббий хизматлар кўрсатилиб келинмоқда. Энг сўнгги тиббиёт ускуналари билан жиҳозланган клиника “Микрокредитбанк” АТБдан 4,5 млн. АҚШ доллари миқдорида кредит олган ва бугун 24 нафар аҳоли бандлигини таъминлаган. Айни пайтда малакали шифокорлар, хушмуомала ҳамширалар шинам клиникада беморларга хизмат қилиб келмоқда.
Шундан сўнг пресс-тур иштирокчилари Ғиждувон туманидаги “GIJDUVAN ECO BOTTLERS” МЧЖга йўл олишди.
Туманнинг “Барака” маҳалласида жойлашган ушбу корхонага Алишер Ғуломов раҳбарлик қилади. Тадбиркор корхонасида мева шарбатлари ҳамда салқин ичимликлари ишлаб чиқариш билан шуғулланади. Фаолиятини 4 млрд. сўм кредит билан бошлаган ва айни пайтда яна 12 млрд. сўм кредит олиб, қўшимча ускуналар харид қилиш эвазига 58 нафар аҳоли бандлигини таъминлаган.
Журналистлар пресс-тур давомида корхона фаолияти билан яқиндан танишди. Бугун корхона “ECO” бренди остида маҳаллий бозорни газли ва газсиз сув билан таъминламоқда. Корхона жорий йил якунига қадар мева шарбатлари ҳам ишлаб чиқаришни йўлга қўйиш учун Хитой давлати билан ҳамкорликни бошлаган.
Шунингдек, пресс-тур давомида журналистларга банкнинг Бухоро вилояти ҳудудий бўлинмаларига бириктирилган 59 та маҳаллада фаолият олиб бориш учун 18 нафар “Маҳалла банкири” ва 59 нафар ёрдамчи агентларнинг фаолияти, улар томонидан йўлга қўйилга микролойиҳалар ҳақида ҳам маълумотлар берилди.
Жорий йилнинг ўтган даврида банк томонидан 7,4 трлн. сўм кредит ажратилган. Бундан 247 та йирик корхонага 1,7 трлн. сўм эквивалентида кредит линиялари ажратилиши ҳисобига 6 300 га яқин ишчи ўрни яратилади. Шундан 558,3 млрд. сўми хорижий кредит линияларига тўғри келади.
Бухоро вилояти бўйича эса 30 та йирик тадбиркорлик субъектларига 111 млрд. сўм эквивалентида кредит линиялари ажратилиши ҳисобига 500 га яқин ишчи ўрни яратилади. Мазкур маблағларнинг 43,2 млрд. сўми хорижий кредит линияларидан тақдим этилди.
Банк Ахборот хизмати
Яна кўринг
Тарихий қадам: MIGA кафолати остида халқаро инвестицияларни жалб қилинди
