Жорий йилнинг 17-21-феврал кунлари Микрокредитбанк ҳомийлигида Жиззах вилоятидаги “Гулчи опа томорқа хизмати” кластери ўқув марказида чимбойлик 25 нафар ишсиз хотин-қиз гулчилик ва томорқа хизматлари бўйича ўқув семинари ташкил қилинганлиги ҳақида хабар берган эдик. Бугун ушбу ўқув-семинарнинг амалий натижалари кўрина бошлади — иштирокчилардан 15 нафари аллақачон ўз тадбиркорлик фаолиятини йўлга қўйди. Уларга банк молиявий кўмаги билан иссиқхоналар ташкил этиб берилди.
Банк Бошқарув раиси ўринбосари Шахло Ибрагимова Чимбой туманига ташриф буюриб, ўқув-семинардан сўнг амалга оширилган ишлар билан танишди. У дастлаб Гулистон маҳалласида бўлиб, гулчилик ва иссиқхона ташкил қилган хотин-қизлар фаолиятини кўздан кечирди. Улардан бири Роза Илауова. Унга Микрокредитбанк томонидан иссиқхона қуриб берилганидан сўнг у ерда Роза опа ҳар хил турдаги гул кўчатлари ва қулупнай кўчатини парваришламоқда. Бу каби ташаббус Гулистон маҳалласидаги яна бешта хонадонда жорий этилган.
Гужумли маҳалласида истиқомат қилувчи Олмагул Қанлибекова ҳам гул кўчатлари парвариши билан шуғулланмоқда. У ўқув-семинар давомида олган билимларини амалиётга татбиқ этар экан, банк мас’уллари билан суҳбатда янги фаолиятидан мамнунлигини билдирди.
Ҳисоб-китобларга кўра, 1 сотих томорқа ерда ташкил этилган иссиқхоналар йилига 40 миллион сўмгача даромад келтириши мумкин. Шунингдек, айрим хонадонларда гулчилик билан бирга паррандачилик ва чорвачилик фаолияти ҳам йўлга қўйилганлиги аёлларнинг даромад манбаларини янада кенгайтиришга ёрдам беради.
Ҳозирда ўқув-семинарда иштирок этган яна 10 нафар хотин-қиз ўз тадбиркорлик фаолиятини бошлаш учун тайёргарлик ишларини олиб бормоқда.
Шахло Ибрагимова чимбойлик гулчи опа-сингиллар билан учрашувида уларнинг тез орада даромадли тадбиркорлар сафида бўлишларига умид билдирди.
Эʼтиборли жиҳати, ушбу ташаббус нафақат иштирокчи аёлларнинг ҳаётини яхшилашга хизмат қилади, балки улар ўз тажрибаларини келгусида Чимбой туманидаги бошқа қатор маҳаллаларда ҳам жорий қилиши кўзда тутилмоқда ва бу орқали ишсиз хотин-қизларни тадбиркорликка йўналтириш мақсад қилинган.
Банк Ахборот хизмати
Яна кўринг
Тарихий қадам: MIGA кафолати остида халқаро инвестицияларни жалб қилинди
