Ўзбекистонда қишлоқ хўжалигининг барқарор ривожланиши учун кенг имкониятлар эшиги очилган. Айниқса, давлатимиз раҳбари томонидан томорқа ерлари ва деҳқон хўжаликлари ер майдонларидан самарали фойдаланиш, соҳага замонавий бошқарув тизимини жорий этиш, юқори даромадли ва экспортбоп маҳсулотлар етиштиришни молиявий қўллаб-қувватлашга қаратилган ташаббус ва қарорлари соҳанинг ривожига хизмат қилмоқда. Бу эса ҳудудларда аҳолини тадбиркорликка жалб қилиш, уларни юқори даромадли меҳнат билан бандлигини таъминлаш ва камбағалликдан чиқаришга қаратилгани билан аҳамиятлидир.
Бугун “Микрокредитбанк” АТБ ҳам давлат раҳбарининг ташаббуслари ижросини таъминлашни ўз мақсади, деб билган ҳолда қатор лойиҳаларни амалга ошириб келмоқда.
Бунинг исботи сифатида “Микрокредитбанк” АТБ ҳамда “Қува – Агро стар” МЧЖ томонидан Фарғона давлат техника университетида Фарғона водийсидаги етакчи экспортёрлар, тадбиркорлар, маркетинг йўналишида фаолият кўрсатиш ниятидаги ёшлар иштирокида ташкил этилган ўқув семинарини мисол қилиб келтириш мумкин.
Мазкур ўқув семинарида Микрокредитбанк мутасаддилари, “Қува – Агро стар” МЧЖ раҳбарияти, Фарғона вилояти ҳокимлиги вакиллари ҳамда 40дан ортиқ тингловчилар қатнашди.
“Маркетинг ва экспорт” мавзусидаги 4 кунлик семинарни Россия давлатидан таклиф этилган мутахассис Наталя Булгакова олиб борди ва экспортчи тадбиркорлар ҳамда маркетинг йўналишига қизиқиш билдирган ёшларга жаҳон тажрибаси асосидаги зарур билимларни тақдим этди.
Шунингдек, ўқув жараёнида томорқа ер эгалари ва деҳқон хўжаликлари масъулларига минтақада янги экспорт географиясини ташкил қилиш, маҳсулотларни етиштиришдан ташқари сақлаш, қайта ишлаш, уларни қадоқлаш ва ташиш билан боғлиқ инновациялар, янги технологияларга алоҳида эътибор қаратиш зарурлиги таъкидланди ҳамда бу борадаги жаҳон тажрибаси мисоллар билан тушунтириб берилди.
Ўқув курси якунида семинар қатнашчилари махсус сертификатлар билан тақдирланди.
Хулоса шуки, семинар томорқа ва деҳқон хўжаликлари эгалари, тадбиркорлар ва ҳамкорлар учун замонавий билимлар, амалий кўникмалар ва халқаро тенденциялар билан танишиш имкониятини яратди, десак адашмаган бўламиз.
Банк Ахборот хизмати
Яна кўринг
Тарихий лаҳзани ифодаловчи эсдалик тангалари МКБАНКда сотувда
Кредитдан натижагача: Бухоролик тадбиркорларнинг муваффақият йўли
