Ўзбекистонда хотин-қизлар тадбиркорлиги янги босқичга кўтарилди. Аёлларнинг ишбилармонлик фаолиятини ривожлантириш учун яратилаётган шароитлар нафақат иқтисодий ўсишга, балки уларнинг жамиятдаги фаоллигини оширишга хизмат қилмоқда. Бу жараёнда давлат раҳбарининг қўллаб-қувватлаши ҳамда банклар томонидан кўрсатилаётган молиявий ёрдамнинг аҳамияти катта.
Тошкент шаҳри, Чилонзор туманидаги “Гулистон” маҳалласида жойлашган “ЯрнтехтилеФотима” ҳунармандчилик маркази — хотин-қизлар тадбиркорлигини қўллаб-қувватлаш борасидаги муҳим ташаббуслардан бири десак, муболаға бўлмайди.
Тадбиркор Фотима Қурбонова раҳбарлик қилаётган ушбу марказда тўқувчилик, каштачилик, миллий услубдаги тақинчоқлар ва эсдалик буюмларини тайёрлаш бўйича амалий ўқув курслари ташкил этилган. Фотима Қурбонова бу лойиҳа орқали маҳаллий аҳолига касб ўргатишни, айниқса, ишсиз ва ногиронлиги бор аёллар учун янги имкониятлар эшигини очишни мақсад қилган.
Фотима Қурбонова ташаббуси билан иш бошлаган марказ “Микрокредитбанк” АТБ томонидан 100 миллион сўмлик имтиёзли кредит билан қўллаб-қувватланди. Натижада 115 нафар хотин-қизлар доимий иш билан банд бўлди, 3000 нафар касб ўрганувчилар онлайн ва офлайн шаклда таълим олмоқда. Марказда ўқишни муваффақиятли якунлаган ёшларнинг 13 нафари ўз бизнесини йўлга қўйди, 55 нафари эса шу марказнинг ўзида иш фаолиятини давом эттирмоқда.
Бундан ташқари, банк томонидан ҳунармандчиликка ўқиб, ўз йўлини топган фуқароларга имтиёзли кредитлар ажратилиб, уларнинг шахсий бизнесини йўлга қўйишлари учун имкониятлар яратилмоқда.
Ушбу марказда тайёрланган маҳсулотлар нафақат маҳаллий бозорда, бадки халқаро бозорда ҳам талаб ортиб бормоқда. Мисол учун, ушбу ҳунармандчилик буюмлари Бирлашган Араб Амирликлари, Жанубий Корея, АҚШ ва Европа давлатларига ҳам экспорт қилинмоқда. 
- Биз ҳунармандчилик маҳсулотларимизни хорижий давлатларга Интернет орқали сотишни йўлга қўйдик, - дейди тадбиркор биз билан суҳбатда. – Ўқувчиларимизга шу ерда ҳунар сирларини ўрганиб, ўз бозорини топишига кўмак беряпмиз. Албатта, бундай натижаларга эришишимизда Микрокредитбанкнинг молиявий қўллаб-қувватлашининг ҳам алоҳида ўрни бор. Кредитларни ҳам ўз вақтида тўлаб боряпмиз. Хуллас, ҳам хотин-қизларга ёрдам беряпмиз, ҳам даромад оляпмиз.
Албатта, кейинги йилларда юртимизда хотин-қизлар тадбиркорлиги ривожланиб бормоқда. Бу борада тижорат банклари томонидан ажратилаётган имтиёзли кредитларнинг ҳам аҳамияти бисёр.
Мисол учун, 2025-йилнинг ўтган даврида Микрокредитбанк томонидан жами 11 минг 268 нафар хотин-қизларга 201 млрд. сўмга яқин имтиёзли кредитлар ажратилган бўлиб, бунинг натижасида 10 минг дан ортиқ янги иш ўрни яратишга эришилди.
Хотин-қизлар тадбиркорлигини қўллаб-қувватлаш нафақат иқтисодий ўсишни таъминламоқда, балки аёлларнинг жамиятдаги мавқеини мустаҳкамлашда ҳам муҳим аҳамият касб этмоқда. Фотима Қурбонова каби ташаббускор аёллар юзлаб инсонларга янги имконият эшикларини очмоқда. Бу эса, ўз навбатида, юртимиз хотин-қизлари учун ишбилармонлик ва муваффақият даври бошланганини англатади.
Банк Ахборот хизмати
Яна кўринг
Тарихий лаҳзани ифодаловчи эсдалик тангалари МКБАНКда сотувда
Кредитдан натижагача: Бухоролик тадбиркорларнинг муваффақият йўли
