Ма’лумки, жорий йилнинг 22-апрел куни Ўзбекистон Республикасининг “Кредиторларнинг гаров билан таʼминланган талабларини қаноатлантириш тизими янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги Қонуни имзоланди.
Мазкур Қонунга асосан, кредиторларнинг гаровдаги мулкка нисбатан ҳуқуқлари устуворлигини таʼминлаш, кредиторлар талабларини суддан ташқари тартибда қондириш тизимини ривожлантириш, мажбуриятларни гаровдаги мол-мулк ҳисобидан ундириш жараёнларини соддалаштиришни назарда тутувчи бир қатор ўзгартириш ва қўшимчалар киритилди.
Жумладан, ушбу қонунда Фуқаролик кодексига, “Гаров тўғрисида”ги, “Ипотека тўғрисида”ги ҳамда “Суд ҳужжатлари ва бошқа органлар ҳужжатларини ижро этиш тўғрисида”ги қонунларига қуйидаги ўзгартириш ва қўшимчалар киритилди:
Мисол учун, кредит қарздорлиги миқдори жуда арзимас бўлганда ундирув гаров мулкига қаратилмаслиги қонунчиликда кўрсатилган бўлса-да, унинг миқдори аниқ белгиланмаганлиги сабабли бу норма амалиётда турлича талқин этилиб келинмоқда эди. Шу сабабли, қонун билан кредит қарздорлиги суммаси гаров қийматининг 15 фоизидан кам бўлса ҳамда кредит тўловини кечиктириш кетма-кет 3 ойдан кам бўлса, ундирув гаров мулкига қаратилмаслиги белгиланди.
Қонун билан тарафларнинг розилиги мавжуд бўлган ҳолларда, ундирувни гаровдаги мулкка қаратишни суднинг иштирокисиз амалга ошириш мумкинлиги назарда тутилмоқда. Ушбу қонунга қадар эса кредитдан қарздорликни қоплаш учун гаровдаги мулкни сотишга қарздор ва учинчи шахслар (масалан, турмуш ўртоғи) розилик берган тақдирда ҳам ундирув суд тартибида ҳал этилиши шарт эди.
Шунингдек, “Суд ҳужжатлари ва бошқа органлар ҳужжатларини ижро этиш тўғрисида”ги қонунга кредитдан қарздорликни ундириш гаров мулкига қаратилганда, мулк ауксионга бозор қийматида қўйилиши назарда тутилмоқда. Бу эса банк ва қарздорларнинг ортиқча оворагарчилигини, ундирув муддати асоссиз чўзилишини ва ортиқча суд харажатларининг олдини олади.
Банк Ахборот хизмати
Яна кўринг
