Ўзбекистон Республикаси Президентининг 2023 йил 23 февралдаги «Касаначиликни янада ривожлантиришга оид қўшимча чора-тадбирлар тўғрисида»ги ПҚ-70-сонли қарорига асосан, Камбағалликни қисқартириш ва бандлик вазирлигида «Ҳунармандчилик ва касаначиликни қўллаб-қувватлаш жамғармаси» ва «Микрокредитбанк» акциядорлик-тижорат банки тасарруфида «Касаначилар мактаби фаолиятини ривожлантириш маркази» ташкил этилган.
Касаначилик ва ҳунармандчиликни ривожлантириш орқали ишсиз аҳоли, айниқса, хотин-қизлар, меҳнатга лаёқатли ногиронлиги бўлган шахсларнинг иш билан бандлигига кўмаклашиш, ишлаб чиқариш ва хизматлар кўрсатишни янада кенгайтириш мақсадида куни кеча «Микрокредитбанк» акциядорлик-тижорат банки ва Ўзбекистон Республикаси Ҳунарманд уюшмаси ўртасида ўзаро ҳамкорлик меморандуми имзоланди.
Мазкур меморандум «Микрокредитбанк» акциядорлик-тижорат банки Бошқарув раиси ўринбосари И.Джуманиязов ва Ҳунарманд уюшмаси раисининг биринчи ўринбосари Қ.Джамалов томонидан имзоланди ва келгусидаги ишлар тўғрисида келишиб олинди.
Бу орқали ҳудудларда ҳунармандчилик ва касаначилик фаолиятининг самарадорлигини тубдан ошириш, аҳоли бандлигини таъминлаш учун шарт-шароитлар яратиш, касаначилик ва ҳунармандчилик фаолияти бўйича мақсадли дастурлар ишлаб чиқиш ҳамда ишсиз фуқароларни касаначиликка оид касб-ҳунарга ўқитиш ишларини ташкил этиш режалаштирилган.
Шунингдек, апрель ойида банкимиз томонидан Бухоро вилоятида касаначилик бўйича амалга оширилган кенг қамровли ишлар давоми сифатида бугун ўзаро ҳамкорлик бўйича тузилган меморандум ҳам режадаги чора-тадбирлар ижросини жадаллаштиришда дастуруламал бўлиб хизмат қилади.
Банк Ахборот хизмати
Яна кўринг
WE-Finance Code ташаббусининг йиллик ҳисобот йиғилиши бўлиб ўтди
