Ижтимоий тармоқларда тарқалган “Микрокредитбанк” Жума филиали томонидан "Кичкинтойлар" НТМга зўравонлик ишлатилганлиги юзасидан “Микрокредитбанк” АТБ қуйидагиларни маълум қилади.
Мазкур ҳолат бўйича мурожаат банк томонидан амалдаги қонунчилик талаблари асосида батафсил ўрганилди.
Аниқланишича, “МАҲАЛЛА KICHKINTOYLARI” нодавлат таълим муассасасига 2021 йилда имзоланган кредит шартномалари асосида жами 1 млрд 523 млн сўм миқдорида имтиёзли кредит ажратилган. Кредит таъминоти сифатида гаровга қўйилган кўчмас мулк бўйича тегишли гаров шартномалари расмийлаштирилган.
Кредит шартномаси шартларига мувофиқ, қарздор томонидан тўловлар ўз вақтида амалга оширилмаганлиги сабабли банк қонунчиликда белгиланган тартибда судга мурожаат қилган. Фуқаролик ишлари бўйича Пастдарғом туман судининг ҳал қилув қарори билан кредит қарздорлигини ундириш ҳамда ундирувни гаров мулкига қаратиш белгиланган.
Суд қарори асосида ижро ҳужжати Мажбурий ижро бюросига юборилган. Ижро ҳаракатлари давомида гаров мулки электрон онлайн-аукцион савдоларига чиқарилган, бироқ харидорлар томонидан қизиқиш билдирилмаганлиги сабабли сотилмаган.
Амалдаги қонунчиликка мувофиқ, такрорий аукционларда реализация қилинмаган гаров мулки ундирувчига белгиланган тартибда таклиф этилади. Шу асосда Мажбурий ижро бюросининг таклифига биноан мазкур кўчмас мулкни банк балансига натура шаклида қабул қилиш бўйича қонуний тартибдаги ишлар амалга оширилмоқда.
Шунингдек, мурожаатчининг бошқа ижро ҳужжатлари бўйича қарздорликлари мавжудлиги сабабли, Мажбурий ижро бюроси томонидан қонунчиликда назарда тутилган тартибда нафақа тўловлари ва банк картасига нисбатан тегишли ижро чоралари қўлланилган.
“Микрокредитбанк” АТБ барча ҳаракатларни фақат амалдаги қонунчилик, суд қарорлари ҳамда ваколатли давлат органлари ҳужжатлари асосида амалга оширади. Банк манфаатдор томонларнинг ҳуқуқларини ҳурмат қилади ҳамда фуқаро қабул қилинган қарорлар ёки ижро ҳаракатларидан норози бўлган тақдирда уларни қонунчиликда белгиланган тартибда ваколатли органлар ёки суд орқали кўриб чиқиш ҳуқуқига эга эканлигини эслатиб ўтади.
Банк Ахборот хизмати
Яна кўринг
Фирибгарлар фаол бўлиши мумкин — эҳтиёт бўлинг!
Мижозлар билан очиқ мулоқот:МКБАНК алоқа каналлари орқали келиб тушган мурожаатларни таҳлил қилди
