Қашқадарё вилоятида хотин-қизларни тадбиркорликка жалб этиш, уларнинг бандлигини таʼминлаш ва банк хизматларидан кенг фойдаланиш имкониятларини яратиш мақсадида "Микрокредитбанк" АТБ томонидан кенг кўламли ишлар амалга оширилмоқда. Бу жараёнда банк Раҳбарияти тадбиркорлар билан учрашиб, уларнинг муаммолари ва таклифларини ўрганиш, молиявий ёрдам механизмларини тушунтириш ҳамда банк хизматларига бўлган ишончни оширишга қаратилган ташаббусларни кучайтирмоқда.
Банк Бошқарув раиси ўринбосари Шаҳло Ибрагимова ҳамда Ижтимоий дастурларни амалга ошириш департаменти директор ўринбосари Бобур Раджабов ҳудудларда олиб борилаётган ишлар билан яқиндан танишиш мақсадида Қашқадарё вилоятига ташриф буюрдилар. Мутасаддилар маҳаллий тадбиркорлар билан мулоқот қилиб, уларга банк томонидан таклиф этилаётган имтиёзли кредитлар, молиявий хизматлар ҳақида маʼлумот бердилар.
Дастлаб Қарши шаҳридаги "Универсал Перфеcт Спеед" масʼулияти чекланган жамияти фаолияти билан танишишди. Корхона раҳбари Шахло Холназаровага Микрокредитбанк томонидан 700 миллион сўм миқдорида имтиёзли кредит ажратилган бўлиб, у бу маблағдан самарали фойдаланган ҳолда мебел ишлаб чиқаришни йўлга қўйган. Шунингдек, у касб-ҳунарга ўргатиш мақсадида ўқув маркази ҳам ташкил этган.
— Уйда ўтирган хотин-қизларни 3–6 ойлик курсларга жалб қилиб, уларга турли касб ва ҳунарлар ўргатяпмиз. 2024-йил давомида 500 нафардан ортиқ аёлга уй ҳамширалиги, ошпазлик, тикувчилик, оилага тайёргарлик каби йўналишлар бўйича таʼлим берилди. Шунингдек, ҳаётга энди қадам қўяётган ёшлар учун дурадгорлик, пайвандчи, сантехник ва боғбонлик бўйича курслар ҳам ташкил қилинган. Жорий йилнинг 1-майидан бошлаб ИТ, компютер графикаси каби замонавий йўналишлар ҳам қўшилади, — дейди тадбиркор
Шахло Холназарованинг таʼкидлашича, ўқув марказининг фаолиятини янада кенгайтириш учун банк томонидан қўшимча ёрдамлар кўрсатилаётгани катта аҳамият касб этмоқда. Хусусан, бўш турган бинолардан самарали фойдаланиш орқали марказ фаолиятини янада ривожлантириш режалаштирилган.
Шу куни мас’уллар Қарши туманида тадбиркорлик билан шуғулланаётган бир қатор субектлар фаолияти билан танишди. Жумладан, "Отабек Ҳамдамов" МЧЖ томонидан амалга оширилаётган юмшоқ ўйинчоқлар ишлаб чиқариш лойиҳаси ҳамда якка тартибдаги тадбиркор Нафиса Аслонова томонидан ташкил этилган нодавлат мактабгача таʼлим муассасасида бўлишди.
Учрашув давомида тадбиркорларга банк томонидан таклиф этилаётган молиявий хизматлар, имтиёзли кредитлар ва бошқа қўллаб-қувватлаш механизмлари ҳақида батафсил маʼлумот берилди. Шунингдек, банк мижозига айланиш тартиби, тадбиркорлар учун мавжуд афзалликлар ва молиявий ресурслардан самарали фойдаланиш имкониятлари ҳақида тушунтиришлар ўтказилди.
2025-йилнинг ўтган даври мобайнида Қашқадарё вилояти бўйича 2 516 нафар тадбиркорга 44,5 миллиард сўм имтиёзли кредит ажратилган бўлиб, шундан 51 фоизи – 1 282 нафар хотин-қизларнинг лойиҳаларини молиялаштиришга йўналтирилган. Жорий йил охиригача вилоятда 2 949 нафар ишсиз хотин-қизнинг касб-ҳунарга ўқитилиши ва уларнинг бандлигини таʼминлаш режалаштирилган.
Банк Ахборот хизмати
Бошқа янгиликлар
МКБАНК 1/8 финалига йўл олди!
