МКБАНК шаффофлик ва қонун устуворлиги йўлида

МКБАНКда 8 декабрь — Ўзбекистон Республикасининг Конституцияси қабул қилинган кун муносабати билан “Конституция – инсон қадри, эркинлик, тенглик ва адолат гарови!” номли маънавий-маърифий тадбир ҳамда 9 декабрь — Халқаро коррупцияга қарши курашиш куни бўйича “Очиқ эшиклар” куни ўтказилди.

Ушбу икки муҳим сана муносабати билан ташкил этилган очиқ мулоқотда Олий мажлис қонунчилик палатаси депутати Ботирали Шодиев, Аксилкоррупсия ойлиги доирасида Марказий банкнинг Комплаэнс хизмати Бошқарма бошлиғи Абдулазиз Юсупов, ОАВ вакиллари ва банк ходимлари иштирок этишди.

Конституциянинг жамият тараққиётидаги ўрни, ҳар бир фуқаро ҳуқуқларини ишончли ҳимоя қилувчи олий ҳуқуқий кафолат сифатидаги аҳамияти алоҳида таъкидланди. Конституциядаги ҳар бир модда – бу нафақат ҳуқуқий қоидалар, балки ҳар бир фуқаронинг шаъни, эркинлиги ва фаровон ҳаёти учун яратилган асос эканлиги айтиб ўтилди. Шунингдек, банк фаолиятида қонун устуворлигини таъминлаш, мижозлар ҳуқуқларини ҳимоя қилиш, адолат, ҳалоллик ва масъулият каби қадриятларда Конституцияда белгилаб қўйилган ҳуқуқий кафолатлар асосий ўрин тутиши алоҳида қайд этилди.

Тадбирда яна коррупцияга оид амалдаги қонун ҳужжатлари мазмун-моҳияти ва уларда белгиланган вазифалар ижроси, очиқлик, шаффофлик ва коррупцияга қарши курашиш йўналишида амалга оширилаётган ишлар юзасидан тизимда олиб борилаётган чора-тадбирлар ҳақида маълумот берилди.

Шунингдек, банкда коррупцияга оид салбий ҳолатлар ва бундай ҳуқуқбузарликларга жазо муқаррарлиги алоҳида таъкидланди. Шунинг учун ҳам ҳар бир ходимдан бу иллатга қарши курашда фаол иштирок этиши ҳаётий мисоллар билан тушунтирилди.

Тадбир охирида банкда коррупцияга ёки ва манфаатлар тўқнашувига дуч келганда алоқа каналлари орқали хабар бериш имкони мавжудлиги яна бир бор эслатиб ўтилди.

Самимий ва очиқ мулоқот руҳда ўтган мазкур маънавий-маърифий тадбирлар МКБАНК жамоасининг ҳуқуқий саводхонлигини янада оширишда муҳим восита бўлиб хизмат қилишига ишонамиз.

Банк Ахборот хизмати