МКБАНКда «Баракали буғдой» ва «Агро захира» кредит маҳсулотлари жорий этилди

Ўзбекистон Республикаси Вазирлар Маҳкамасининг 2025 йил 31 майдаги «2025 йил ҳосилидан буғдой харид қилиш ва ички бозорни дон билан барқарор таъминлаш чора-тадбирлари тўғрисида»ги 345-сонли қарорида Иқтисодиёт ва молия вазирлиги ҳузуридаги Қишлоқ хўжалигини давлат томонидан қўллаб-қувватлаш жамғармаси томонидан уруғлик буғдойни харид қилиш, тайёрлаш ва суғурталаш харажатларини кредитлаш учун 12 ой муддатга (шундан, 6 ой имтиёзли давр билан), Марказий банк асосий ставкасининг 50 фоизи миқдоридан 4 фоиз бандга паст ставкада кредит ресурсларини уруғлик буғдой тайёрлаш корхоналарига хизмат кўрсатувчи тижорат банкларига жойлаштирилиши маълум қилинган.

Мазкур қарор ижросини таъминлаш мақсадида, тижорат банкларига ушбу кредит ресурслари ҳисобидан уруғлик буғдой тайёрлаш корхоналарига суғурта полиси асосида Марказий банк асосий ставкасининг 50 фоизи миқдорида 12 ой муддатга (шундан, 6 ой имтиёзли давр билан) кредит ажратиши белгиланган.

Юқоридагиларни инобатга олган ҳолда «Микрокредитбанк» АТБ томонидан қишлоқ хўжалиги корхоналарига (фермер хўжаликларига) сифатли уруғ етказиб бериш мақсадида уруғлик буғдойини харид қилиш ҳамда тайёрлашда талаб этиладиган айланма маблағлар учун “Баракали буғдой” кредити ишлаб чиқилди.

Мазкур кредит миллий валютада тадбиркорлик субъекти ҳисобланган юридик шахслар учун тақдим этилади. Бунда мижоздан Фьючерс ва контрактация шартномаси, ариза, бизнес-режа ёки пул оқимлари прогнози, товар ва маҳсулотлар (хизматлар) бўйича тузилган олди-сотди шартномаси нусхаси ва бошқа қўшимча ҳужжатлар талаб этилиши мумкин.

Шунингдек, банк томонидан ҳудудларда озиқ-овқат хавфсизлигини таъминлаш ҳамда асосий истеʼмол маҳсулотлари таннархининг ошиб кетишининг олдини олиш мақсадида озиқ-овқат маҳсулотларини ғамлаш ҳамда сақлаш ва қайта ишлашда талаб этиладиган айланма маблағларни тўлдириш учун “Агро захира” кредит маҳсулоти ҳам ишлаб чиқилди.

“Агро захира” кредити кичик ва ўрта тадбиркорлик субъектлари, яъни қишлоқ хўжалиги ҳамда озиқ-овқат маҳсулотларини сақлаш боʼйича махсус омбор, совутиш омборларига эга бўлган мижозларга ёки ушбу фаолиятни амалга ошириш ва бино-иншоотидан фойдаланиш ҳуқуқини берувчи ижара шартномалари расмийлаштирган юридик шахслар учун 6 ойгача, 4 ойгача асосий қарз тўлови бўйича имтиёзли муддат билан тақдим этилади.

Кредитнинг юқори миқдори 5 млрд.сўм бўлиб, йиллик 30 фоизни ташкил этади.