Навбатдаги китоб ярмаркаси “TaskinKitoblar” бренди билан ўтказилди

Микрокредитбанкда навбатдаги китоб ярмаркаси “TaskinKitoblar” бренди билан ҳамкорликда ташкил этилди. 

Микрокредитбанк ходимларининг китоб ўқишга иштиёқи баландлиги ҳар чоракда ўтказилиб келинадиган китобхонлик танловлари, турли интеллектуал ўйинларда янада яққолроқ намоён бўлади. Aслида, ҳисоб-китоб, пул кредит сиёсати соҳаси вакилларининг нафақат илмий ёки соҳавий билимларга эга бўлиши, балки дунёқараши кенг, маънавий дунёси бой бўлиши ҳам аҳамиятга эга. 

Китоб - дунёнинг саккизинчи мўжизаси дея эътироф этилиши ҳам бежиз эмас. У инсоният тараққиётининг асосини ташкил этади. Китоб мутолааси эса инсоннинг нутқ ва муомала маданиятини ошириши билан биргаликда ижобий фикрлашини ҳам ривожлантиради. Микрокредитбанкда ташкил этилган китоб ярмаркасида “TaskinKitoblar” брендидан ранг-баранг бадиий ҳамда илмий-оммабоп нашрлар тақдим этилди. 

Эътиборли томони 17 декабрда ташкил этилган китоб ярмаркасида банк хотин-қизлари фаоллик кўрсатган бўлса, бугунги ярмаркада йигитлар томонидан харид қилинган китоблар сон жиҳатдан кўпроқни ташкил этди. Эътибор берганимиз, улар соҳага оид иқтисодий ва сиёсий мазмундаги китобларни, шу билан бирга жаҳон адабиётининг дурдона асарларидан харид қилишди.

Aбдулла Қодирийнинг "Ўткан кунлар" романини ўқимаган одам бўлмаса керак. Aсарнинг инглиз тилида чоп этилган китоби ҳам банкимиз ходимларида катта қизиқиш уйғотди ва ушбу китобнинг бир қанча нусхаси ҳамёнбоп нархларда харид қилинди. Фёдор Достоевский, Дейл Карнеги, Жорж Оруел, Эрих Мария Ремарх, Жеймс Клир, Чингиз Aйтматов асарлари ҳам ўз харидорларига эга бўлди.

Банк Aхборот хизмати