Ўзбекистонда аёллар тадбиркорлигини қўллаб-қувватлаш борасидаги ишлар Берлинда эʼтироф этилди

Берлин шаҳрида расмий ташриф билан бўлиб турган Ўзбекистон делегацияси Ўзбекистон Республикасининг Германия Федератив Республикасидаги Элчихонаси ташаббуси билан ташкил этилган “Аёлларнинг жамиятдаги роли: Ўзбекистон-Германия тадбиркор аёллари анжумани”да иштирок этди.

Анжуманда Ўзбекистон Республикасининг Германиядаги Фавқулодда ва Мухтор Элчиси Дилшод Ахатов, Ўзбекистон Республикаси Президенти Админстрациясининг Ташқи алоқалар департаменти Ташқи сиёсат ва ташқи иқтисодий ҳамкорликни кенгайтиришни ахборот-таҳлилий таʼминлаш бошқармаси бошлиғи, Ўзбекистон Савдо-саноат палатаси қошидаги тадбиркор аёллар Кенгаши раиси Нозима Давлетова, “Микрокредитбанк” АТБ Бошқарув раиси ўринбосари Шахло Ибрагимова, “Ҳамроҳ” хотин-қизлар тадбиркорлигини қўллаб-қувватлаш компанияси раҳбари Дилфуза Нурматова, Берлин федерал ўлкаси Ички ишлар ва спорт сенатори Ирис Шпрангер, “Спаркассенстифтунг фор Интернатионал Cооператион” ташкилотининг Европа ва Марказий Осиё бўйича директори Матиас Фос, икки мамлакатнинг фаол тадбиркор аёллари ҳамда Германияда истиқомат қилаётган ватандошлар қатнашди.

Анжуманда қуйидаги мавзуларда қизғин муҳокамалар олиб борилди:

 • “Спаркассенстифтунг фор Интернатионал Cооператион” ташкилотининг Ўзбекистондаги фаолияти ва лойиҳалари;

 • Ўзбек хотин-қизларининг тадбиркорлик ташаббусларини молиявий қўллаб-қувватлаш;

 • Аёлларга кўмак ва маслаҳат бериш тизимлари;

 • “СЕС” ташкилотининг аёл тадбиркорларни қўллаб-қувватлашдаги роли;

 • Маданият ва иқтисодиёт орқали аёллар фаоллигини ошириш;

 • Аёл олималарнинг халқаро ҳамкорликдаги иштироки;

 • Ўзбекистонлик ҳунармандлар маҳсулотларини Германия бозорига чиқариш йўллари.

Анжуманда сўз олган Шахло Ибрагимова, Ўзбекистонда хотин-қизларнинг иқтисодий фаоллигини ошириш, тадбиркорликка жалб этиш ва бизнес ташаббусларини молиявий қўллаб-қувватлашга алоҳида эʼтибор қаратилаётганини таʼкидлади:

— Президентимизнинг топшириқларига мувофиқ, тижорат банклари, жумладан, Микрокредитбанк томонидан хотин-қизлар бизнес лойиҳаларини қўллаб-қувватлаш йўналишида бир қатор муҳим ишлар амалга оширилмоқда. Жорий 2025-йилда “Оилавий тадбиркорликни ривожлантириш”, “Кичик бизнесни қўллаб-қувватлаш”, “Ҳамроҳ” дастурлари, “Бизнесга биринчи қадам”, “Маҳалла-бизнес” ва “Менинг маҳаллам” каби кредитлар орқали аёллар бизнеси учун 1 триллион 73 миллиард сўмлик имтиёзли кредитлар ажратилди. Бу орқали 48 мингдан зиёд аёллар тадбиркорликка жалб қилинди. Йил якунига қадар эса яна 1 триллион сўмдан ортиқ имтиёзли кредит ажратиш режалаштирилган.

Анжуманда Микрокредитбанк мижози бўлган тадбиркор аёлларнинг чиқишлари алоҳида эʼтироф этилди. 

“Ворис каштачилари” МЧЖ раҳбари Шахноза Шарипова Микрокредитбанк кўмагида эришган ютуқлари ҳақида сўз юритар экан, миллий ҳунармандчилик соҳасини ривожлантиришдаги имкониятлар билан қатнашчиларни илҳомлантирди. Самарқандлик тадбиркор Умида Бахриддинова эса германияликларни ўзининг шинам меҳмонхонасига таклиф этиб, минтақавий туризм салоҳиятини намоён этди.

Анжуманда икки мамлакат тадбиркор аёллари ўртасида ўзаро ҳамкорликни янги босқичга олиб чиқиш, тажриба алмашиш ва янги қўшма лойиҳаларни амалга ошириш борасида келишувларга эришилди. 

Тадбир якунида Микрокредитбанк, “Спаркассенстифтунг фор Интернатионал Cооператион” ҳамда “Ҳамроҳ” компанияси ўртасида ҳамкорлик меморандуми имзоланди.

Шунингдек, икки давлат тадбиркорларининг ўзаро саёҳатларини ташкил этиш, онлайн форумлар ва маҳсулотлар алмашинуви каби қўшма дастурларни амалга оширишга келишиб олинди. 

Ўзбекистон делегациясининг Берлиндаги расмий ташрифи давом этмоқда.

Банк Ахборот хизмати