Паркент тумани ўзининг бетакрор табиати, мусаффо ҳавоси ва серҳосил ерлари билан ажралиб туради. Шу боис бу ерда қишлоқ хўжалиги соҳаси ҳам тараққий этган: тупроқ-иқлим шароити қулай, аҳолининг деҳқончилик маданияти юксак. Аҳолиси меҳнацевар, ҳудуднинг иқлими шунчалик унумлики — бир чўп эксангиз, кўкариб кетади” дейди ҳазиллашиб паркентлик онахон деҳқонлар.
Сершовқин шаҳардан 50 чақирим узоқликда жойлашган Паркент туманига йўлимиз тез-тез тушади. Сабаби, бу ҳудудда “Микрокредитбанк” АТБ томонидан амалга оширилаётган лойиҳалар жуда кўп. Меҳмон уйлари, хизмат кўрсатиш, туризм, ишлаб чиқариш, касаначилик, чорвачилик ва қишлоқ хўжалиги йўналишларида аҳолига молиявий кўмак кўрсатиш орқали уларнинг фаровонлигини таʼминлашга эришилмоқда. Янги иш ўринлари, янги хизмат турлари йўлга қўйилмоқда. Янгича ёндашув ва янги имкониятлар аҳолига етказилмоқда.
Шундай лойиҳалардан бири — Шампан маҳалласида “Бир контур – бир маҳсулот” тамойили асосида амалга оширилмоқда.
Бу лойиҳа доирасида Шампан маҳалласидаги 59-контурда жойлашган 14 нафар ёшларга, ҳар бирига 1 гектардан, ижарага берилган жами 14 гектар ер майдонида юқори даромадли серҳосил навларга мансуб помидор етиштирилмоқда.
Айни кунларда ҳосил терими бошланиб, маҳсулотлар сараланмоқда. Яхшилари бозорга чиқарилса, майдаси ва урилиб қолганлари қишки мавсум учун қоқи қилинмоқда.
Ҳисоб-китобларга кўра, ушбу ер майдонидан 500 тонна атрофида помидор ҳосили олиниб, 2,4 млрд.сўмга яқин даромад кўрилиши режалаштирилган. Барча харажатлар чегириб ташланганда, ҳар бир ёш 1 гектар ердан 115 млн. сўм фойда кўриши кутилмоқда.
Ҳосил терими сентабр ойига қадар давом этади.
“Бир контур – бир маҳсулот” тамойили асосидаги мазкур лойиҳа деҳқонларнинг моддий аҳволини яхшилаш, қишлоқ жойларда янги иш ўринлари яратиш, замонавий агротехнологияларни жорий этиш ва бозор талабига мос маҳсулот етиштиришда муҳим аҳамият касб этмоқда, - дейди айни дамда деҳқончилик қилаётган ёшлардан бири.
Таʻкидлаш керакки, қишлоқ хўжалигида синалган ва ҳамиша ўзини оқлаб келган ушбу лойиҳа паркентлик ёшлар учун ердан самарали фойдаланиш, юқори ва сифатли маҳсулот етиштириш манбаи бўлиб хизмат қилади. Чунки бу тамойил орқали ҳосилдан даромад олишнинг механизмлари аниқ ишлаб чиқилган, деҳқонларнинг манфаатдорлиги кафолатланган.
Хулоса ўрнида айтиш мумкинки, банк томонидан амалга оширилаётган бу каби саʻй-ҳаракатлар аҳолини тадбиркорликка жалб қилиш ва бандлигини таʻминлаш, даромадларини ошириш, уларни молиявий қўллаб-қувватлаш орқали янги иш ўринларини яратишга қаратилгани билан аҳамиятлидир.
Банк Ахборот хизмати
Яна кўринг
Банк раҳбарияти Бухоро вилоятида аҳоли ҳамда тадбиркорлар билан учрашув ўтказди
Микрокредитбанк раҳбарияти иштирокидаги бу каби тадбирлар бошқа ҳудудларда ҳам давом эттмоқда
Бизнесингизни “Келажакка Қадам” билан ривожлантиринг!
