Пойтахтимиздаги маҳаллаларда кутубхоналар ташкил этилмоқда

Таниқли адабиётшунос Ўзбекистон қаҳрамони Озод Шарафиддинов фарзандлариниг тарбиясидан нолиб маслаҳат сўраб келган кишига: «Фарзандларингизнинг қўлига китоб тутқазинг. Китоб уларга ҳаётни, турмушнинг қийинчилкларига дош беришни, сабрни ва қаноатни ўргатади» деган эканлар. 

Дарҳақиқат, инсон маънавиятини оширадиган, сўз бойлигини тўлдириб борадиган энг муҳими, тўғри йўлни кўрсатадиган энг яқин дўст бу китобдир.

Давлатимиз раҳбари “Китобсиз тараққиётга, юксак маънавиятга эришиб бўлмайди. Дунёдаги ҳар қайси давлат, ҳар қайси миллат биринчи навбатда ўзининг интеллектуал салоҳияти, юксак маънавияти билан қудратлидир. Бундай енгилмас куч манбаи эса, аввало, инсоният тафаккурининг буюк кашфиёти – китоб ва кутубхоналарда, – деб бежиз таъкидламаганлар.

Бугун «Микрокредитбанк» АТБ ташаббуси билан пойтахтимиздаги қатор маҳаллаларда шинам ва кўркам кутубхоналар ташкил этилиб, фойдаланишга топширилмоқда. Улардан бири пойтахтимиздаги Янги ҳаёт тумани «Олчазор» маҳалласида янги ташкил этилган кутубхонадир. 

Ушбу зиё масканида ўзбек ва жаҳон адабиётининг нодир асарлари, иқтисодий китоблар, болалар адабиёти ҳамда турли жанрларда чоп этилган адабиётлар, маънавий-маърифий ва тарбиявий аҳамиятга эга жами 2 мингга яқин китоблар ўрин олган бўлиб, бу маънавият маскани маҳалла аҳли учун кутилмаган совға бўлди. Шунингдек, кутубхонада шахмат ўйнашга қизиқувчилар учун ҳам алоҳида жой ҳозирланган.

Мазкур кутубхонанинг очилиши ёшу кексага чинакам қувонч бағишлайди, десак адашмаймиз. Чунки энди нафақат ёшлар, балки кекса авлод ҳам бўш вақтини ана шу зиё масканида ўтказиши мумкин.

2024 йил 1 март ҳолатига кўра, «Олчазор» маҳалласида 5287 нафар аҳоли, шу жумладан, 2 544 нафар ёшлар, 2 541 нафар хотин-қизлар истиқомат қилади. 

Яна бир кутубхона Олмазор туманидаги «Хончорбоғ» маҳалласида ҳам энг янги китоблар билан бойитилган ҳолда ташкил этилди.

Мазкур кутубхонада ҳам маҳалладаги турли соҳа ва қатлам вакиллари ўзлари учун зарур китобларни топишлари, шунингдек, шахматга қизиқувчилар шахмот ўйнашлари мумкин. Ёшлар ва кексаларни бир манзилга тўплайдиган шинам гўшада айни дамда 1,5 мингдан ортиқ бадиий ва таржима адабиётлар, эртак китоблар, турли энциклопедия ва юртимиз тарихига оид китоблар мавжуд.

Микрокредитбанкка бириктирилган яна бир ҳудуд — Чилонзор туманидаги 5000 дан ортиқ аҳоли яшайдиган «Шарқ» маҳалласи бўлиб, у ерда ҳам замонавий ва шинам кутубхона ташкил этилди. Мингдан ортиқ бадиий ва таржима адабиётлар, иқтисодий ва мотивацион китоблар, болалар адабиёти ва юртимиз тарихига оид китоблар маҳалла аҳли учун ажойиб туҳфа бўлди. Бу маҳаллада ҳам шахматга қизиқувчилар учун шахмот ўйнашларига шароит яратилди.

Айниқса, ушбу маҳаллада истиқомат қилувчи, китобга ўзгача меҳр қўйган Дилноза Алиева анча вақтдан буён ишсиз бўлиб, бугун бу кутубхонанинг очилганидан жуда хурсандлигини ва севимли иши билан шуғулланишидан мамнунлигини яширмади.  

Эътиборлиси шундаки, маҳаллалардаги бу каби кўркам кутубхоналарнинг ташкил этилиши нафақат аҳоли ўртасида китобхонлик маданиятини оширишга, балки шу ҳудудда янги иш ўринлари яратилишига хизмат қилади. 

Микрокредитбанк эса бундай хайрли ишларда доим халқимизга камарбаста бўлишга интилади.

Банк Ахборот хизмати