Самарқандда Туркий давлатлар ташкилотининг биринчи саммити: Қадимий шаҳар халқаро аҳамиятга эга учинчи йирик тадбирга мезбонлик қилмоқда

Хабарингиз бор, Самарқанд шаҳрида 10-11 ноябрь кунлари Туркий давлатлар ташкилотининг биринчи саммити ўтказилади.

Унда Туркий давлатлар ташкилоти иқтисодиёт ва савдо вазирларининг 11-йиғилишида савдо-иқтисодий, инвестициявий ҳамкорликни янада чуқурлаштириш мақсадида, Туркий давлатлар ташкилоти Инвестиция жамғармасини таъсис этиш бўйича Битимни имзоланди.  

Шунингдек, куннинг биринчи ярмида Президентимиз Саммит доирасидаги биринчи учрашувни Венгрия Бош вазири Виктор Орбан билан ўтказди. Учрашувда иқтисодий соҳадаги амалий ҳамкорлик – қўшма инвестиция лойиҳаларини амалга ошириш учун молиявий механизмлар ва қулай шароитлар яратиш масалалари муҳокама қилинди. 

Куннинг иккинчи ярмида давлат раҳбарининг Туркия Республикаси Президенти Режеп Таййип Эрдоған, Озарбайжон Республикаси Президенти Илҳом Алиевлар билан икки томонлама учрашувлари бўлиб ўтади. 

Шу билан бирга эртага, 11 ноябрь куни Президентимизнинг Туркманистон Миллий Кенгаши Халқ Маслаҳати Раиси Гурбангули Бердимуҳамедов билан ҳам учрашувлари режалаштирилган.

Бугун кечки вақт Делегация раҳбарлари Самарқанд туризм маркази ҳудудидаги “Боқий шаҳар” мажмуасига ташриф буюради. Туркий давлатлар ташкилоти аъзо мамлакатлари миллий фольклор санъатини ўзида ифода этган концерт дастури ташкил этилади. 

Самарқанд саммитининг асосий тадбири – Туркий давлатлар ташкилоти давлат раҳбарлари кенгаши мажлиси эртага, 11 ноябрь куни Конгресс марказда бўлиб ўтади. 

Таъкидлаб ўтиш лозим мазкур Саммит Ташкилотнинг аъзо давлатлар раҳбарлари томонидан Президентимизнинг ташаббусларини қўллаб-қувватлаган ҳолда “Туркий цивилизациянинг янги даври: умумий тараққиёт  ва фаровонлик сари” шиори остида ўтказилмоқда.

Саммит кун тартибидан иқтисодиёт, савдо, инвестициялар, транспорт, инновациялар, экология, туризм, маданий-гуманитар ва бошқа соҳаларда ўзаро манфаатли ва кўп қиррали ҳамкорликни янада ривожлантириш, Ташкилот фаолиятини такомиллаштириш масалалари ўрин олган. 

Саммит доирасида 10 дан ортиқ ҳужжат имзоланиши режалаштирилган. Хусусан, унинг асосий ҳужжати – Самарқанд декларациясини қабул қилиш кутилмоқда. Унда минтақавий барқарорлик, хавфсизлик ва барқарор иқтисодий ривожланишни таъминлаш, транспорт алоқаларини мустаҳкамлаш, шунингдек, маданий мулоқотни чуқурлаштириш бўйича қўшма ёндашувлар белгилаб берилган.

Саммит якунида Ташкилотга раислик бир йил муддатга Туркиядан Ўзбекистонга ўтади.

Эслатиб ўтамиз, ҳозирга қадар тадбирда иштирок этиш учун Венгрия Бош вазири Виктор Орбан, Озарбайжон Республикаси Президенти Илҳом Алиев, Туркия Республикаси Президенти Режеп Таййип Эрдоған, Қозоғистон Республикаси Президенти Қосим-Жомарт Тоқаев, Қирғиз Республикаси Президенти Садир Жапаровлар Самарқанд шаҳрига етиб келди. Шунингдек, эртага, 11 ноябрь куни тонгда Туркманистон Миллий Кенгаши Халқ Маслаҳати Раиси Гурбангули Бердимуҳамедовларнинг ташрифлари кутиляпти. 

Шунингдек, саммитда Ташкилот Бош котиби Боғдод Амреев, Халқаро туркий маданият ташкилоти (ТУРКСОЙ) бош котиби Султанбай Раев, Туркий тилли давлатлар парламент ассамблеяси (ТУРКПА) бош котиби Мехмет Сурейя Эр, Халқаро туркий академия президенти вазифасини бажарувчи Фузули Меджидли, Туркий мерос ва маданият фонди президенти Гюнай Эфендиевалар Самарқанд шаҳрига келишди.

Маълумот учун, 2009 йил 3 октябрда «Нахчивон шартномаси» номи билан тарихга кирган битимга мувофиқ, Туркий давлатлар ташкилоти тузилди. Унга Ўзбекистон билан бир қаторда, Озарбайжон, Туркия, Қирғизистон ҳамда Қозоғистон аъзо бўлиб, Венгрия ва Туркманистон кузатувчи мақомига эга.

Банк ахборот хизмати