Ма’лумки, Ўзбекистон Республикасининг 2025-йил 17-апрелда тасдиқланган “Тадбиркорлик субектларини молиявий қўллаб-қувватлаш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги Қонунига асосан тадбиркорларга бир қатор янги имкониятлар берилди.
Жумладан, қонунда бозор муносабатларини янада ривожлантириш шароитларида тадбиркорлик субектларини молиялаштиришнинг янгича ва муқобил воситаларини ишлаб чиқиш, айниқса, тадбиркорларга кафолат тарзида ёрдам кўрсатиш соҳасини кенгайтириш, банк кредитларига муқобил бўлган пул талабномасидан бошқа шахс фойдасига воз кечиш эвазига молиялаш механизмларини такомиллаштиришга қаратилган нормалар белгиланди.
Хусусан мазкур Қонунга кўра, факторинг обекти сифатида юридик шахсга ёки тадбиркорлик субектига нисбатан келиб чиқадиган пул талабномасини белгилаш, пул талабномасидан бошқа шахс фойдасига воз кечиш бўйича тақиқни бузганлик учун жавобгарликни бекор қилиш ва мижознинг контрагенти норезидент бўлганда факторинг операцияларини хорижий валютада амалга оширишга рухсат берилди.
Факторингда қарздорнинг ҳуқуқий ҳимоясини кучайтириш мақсадида молия агенти томонидан тўлов амалга ошириладиган давлат ва валюта тури ўзгартирилишига йўл қўйилмаслиги, шунингдек, факторингда фирибгарлик ҳолатларининг олдини олиш учун пул талабномасидан воз кечиш тўғрисидаги хабарномаларни гаров реестрида рўйхатга олишни йўлга қўйиш назарда тутилган.
Мазкур ҳужжат билан тадбиркорлик субектларига кредит ташкилоти олдидаги пул мажбуриятини бажариш бўйича кафолатлар (кафилликлар) бериш фаолиятини профессионал асосда амалга оширувчи ихтисослашган факторинг ташкилотлари жорий этиш белгиланди.
Эндиликда Қонунга асосан устав фондининг энг кам миқдори кафолатлар бериш ташкилоти учун 100 миллиард сўм, факторинг ташкилотлари учун эса 2 миллиард сўм этиб белгиланади. Мазкур ташкилотлар Марказий банкда ҳисоб рўйхатидан ўтказилиб, уларнинг фаолияти Марказий банк томонидан тартибга солинади ва назорат қилинади.
Банк Ахборот хизмати
Яна кўринг
Тарихий лаҳзани ифодаловчи эсдалик тангалари МКБАНКда сотувда
Кредитдан натижагача: Бухоролик тадбиркорларнинг муваффақият йўли
