“Микрокредитбанк” AТБ Ўзбекистон банк сектори тарихида муҳим воқеани амалга оширди. Банк мамлакатимизда биринчи бўлиб Жаҳон банки гуруҳига кирувчи Халқаро инвестициялар кафолати агентлиги (MIGA) кафолати остида Германиянинг ODDO BHF SE банкидан 50 миллион AҚШ доллари миқдоридаги маблағларни муваффақиятли жалб қилди.
MIGA томонидан тақдим этилган маълумотларга кўра, ушбу транзакция тузилмаси нафақат Ўзбекистон банк сектори, балки Марказий Осиё банк секторида ҳам биринчи ҳисобланади.
Мазкур битим Ўзбекистон банк тизимининг халқаро молия институтлари ва етакчи хорижий банклар билан ҳамкорлигини янада мустаҳкамлашга хизмат қилади ҳамда мамлакатимиз молия бозорига бўлган ишончнинг юқори эканлигини яна бир бор тасдиқлайди.
Жалб қилинган маблағлар кичик ва ўрта бизнес субъектларини молиявий қўллаб-қувватлаш, аёллар тадбиркорлигини ривожлантириш, шунингдек “яшил” ва экологик барқарор лойиҳаларни молиялаштиришга йўналтирилади. Ушбу ташаббуслар тадбиркорлик фаолиятини кенгайтириш, янги иш ўринлари яратиш ҳамда барқарор иқтисодий ўсишни таъминлашга хизмат қилади.
“Микрокредитбанк” AТБ томонидан амалга оширилган мазкур битим банкнинг халқаро молия бозорларидаги нуфузини ошириш, хорижий инвесторлар билан узоқ муддатли ҳамкорликни ривожлантириш ва илғор халқаро молиявий механизмларни жорий этиш йўлидаги муҳим қадамлардан бири ҳисобланади.
Банк келгусида ҳам халқаро молия институтлари ва етакчи хорижий банклар билан ҳамкорликни кенгайтириш орқали Ўзбекистон иқтисодиётининг устувор йўналишларини молиялаштиришга муносиб ҳисса қўшишни давом эттиради.
Банк Ахборот хизмати
Яна кўринг
Андижонда маҳалла агентлари учун навбатдаги ўқув семинари ташкил этилди
МКБАНК билан PayPorterdan тезкор пул ўтказмалари!
