Жорий йилнинг 25-март куни банк томонидан молиялаштирилган Тошкент вилоятидаги “Умид” масʼулияти чекланган жамиятига бир гуруҳ ОАВ вакиллари иштирокида пресс-тур ташкил этилди.
Бугунги кунда мамлакатимизда паррандачиликка катта эʼтибор қаратилмоқда. Чунки айнан паррандачилик аҳолини озиқ-овқат маҳсулотлари билан таʼминланишида асосий аҳамият касб этиб, қишлоқларда одамларнинг иш билан банд бўлишига ҳисса қўшади.
Хабарингиз бор, Ўзбекистон Республикаси Президентининг 2025-йил 30-январдаги ПҚ-34-сон “Чорвачилик ва паррандачиликни қўллаб-қувватлаш, соҳада юқори қўшилган қиймат яратиш бўйича қўшимча чора-тадбирлар тўғрисида”ги қарорига кўра, Паррандачилик соҳасида аҳоли хонадонлари билан кооперация асосида ишлаш тизимини молиялаштириш учун Тикланиш ва тараққиёт жамғармасининг 50 миллион АҚШ доллари миқдоридаги маблағлари “Микрокредитбанк” АТБнинг устав капиталини оширишга йўналтирилган бўлиб, айни дамда мазкур маблағлар ҳисобига республиканинг барча ҳудудларида паррандачиликнинг гўшт ва тухум йўналишида кооперация тизими асосида 1 миллион аҳолини иш билан таʼминлаш бўйича “Парранда боқиш — даромад топиш” лойиҳасини амалга ошириш белгиланган.
Ушбу лойиҳа аҳоли бандлигини таʼминлаш мақсадида кам қувватда ишлаётган корхоналарни молиявий соғломлаштириш, тижорат банклари балансидаги хўжаликларни салоҳиятли йирик корхоналарга бириктириш, ишлаб чиқариш ва қайта ишлаш тармоқлари ўртасида кооперация тизимини ташкил этиш ҳамда янги лойиҳаларни ишга тушириш ҳисобига амалга оширилиши кўзда тутилмоқда.
Мазкур кредит маблағлари кооперация тизими асосида паррандачилик лойиҳаларини амалга ошириш ташаббусини кўрсатган хўжалик субектларига ажратилади.
Қарор ижроси ва шу йўналишдаги корхоналар фаолиятини кенг ёритиш мақсадида банк томонидан молиялаштирилган Тошкент вилоятидаги “Умид” масʼулияти чекланган жамиятига ташкил этилган пресс-тур давомида қатнашчилар корхонада паррандачилик маҳсулотлари ишлаб чиқариш жараёни билан яқиндан танишишди.
Корхонанинг Янгийўл тумани Бўзсув маҳалласида жойлашган 56 та парранда (йиллик қуввати 7,5 млн бош бройлер) боқиш биноларида йилига 9 минг тонна парранда гўшти етиштириш ҳамда ички бозорларга етказиб бериш қувватлари мавжуд.
Шунингдек, 1 та озуқа ишлаб чиқариш комплексида йилига 12,5 минг тонна озуқа ишлаб чиқарилади. 1 та товуқ сўйиш комплексида эса соатига 4 минг бош парранда сўйилади. Корхонадаги 1 та музлаткич 1,2 минг тоннагача маҳсулотни ўзида сақлайди.
Бундан ташқари, кохонада 157 минг бош наслли паррандани боқиш қуввати мавжуд бўлиб, йилига 19 млн дона инкубацион тухум ва 12 млн бош 1 кунлик бройлер жўжалар етиштириш қувватига эга.
Корхонанинг паррандачилик фаолиятини ривожлантириш лойиҳасига “Микрокредитбанк” АТБ томонидан 75 млрд сўм миқдорида кредит ажратилган.
Қарор ижросини та’минлаш мақсадида корхона томонидан вилоятдаги бўш турган ва паст қувватда фаолият юритаётган паррандачилик хўжаликлари билан кооперация асосида парранда боқиш йўлга қўйилмоқда.
Энг муҳими, ушбу корхонада ҳозир 100 та янги иш ўринлари яратилди.
Маʼлумот учун, “Микрокредитбанк” АТБ томонидан жорий йил бошидан буён тадбиркорлик субектларининг инвестицион лойиҳаларини молиялаштириш учун 8 та лойиҳага жами 63 млрд сўмдан ортиқ кредит маблағлари ажратиб берилди.
2025-йилда 10,4 млрд дона (2024-йилга нисбатан 103,8 фоиз) тухум ва 850 минг тонна (105,3 фоиз) тирик вазнда парранда гўшти етиштириш режалаштирилган.
Банк Ахборот хизмати
Яна кўринг
Тарихий қадам: MIGA кафолати остида халқаро инвестицияларни жалб қилинди
