Қуёнчилик сердаромад тармоқлардан бири. Чунки қуёнчиликда кам маблағ сарфлаб, кўплаб парҳез гўшт, сифатли мўйнали тери, майин тивит каби маҳсулотларни етиштириш мумкин. 

Эътиборлиси эса хонадонларда қуён боқиш унча катта харажат талаб қилмайди. Шу боис мамлакатимизда қуёнчилик билан шуғулланаётганлар сони йилдан йилга кўпайиб бормоқда. Қуёнчилик фермалари, катта-катта кластер ва комплекслар ташкил этилмоқда.

Жумладан, “Микрокредитбанк” АТБ республикамизда қуёнчиликни ривожлантиришга масъул этиб белгиланганига ҳам бир неча йил бўлди ва айтиш жоизки, ўтган вақт мобайнида ушбу йўналишда сезиларли ишлар амалга оширилди. 

Натижада республикамиз ҳудудларида 391 та қуёнчиликка ихтисослаштирилган хўжаликлар ташкил қилиниб, ушбу хўжаликларни ва жисмоний шахсларнинг қуёнчилик билан шуғулланиши борасидаги фаолиятини қўллаб-қувватлаш учун банк томонидан жами 5 515 та (шундан 431 та юридик шахсларга ва 5 084 та жисмоний шахсларга) мижозларга 503,0 млрд. сўм миқдорда кредитлар ажратилиб, 8 798 та иш ўрни яратилди.

Шундан, 2022 йилда ажратилган кредитларнинг 32,6 млрд. сўми юридик шахс мақомига эга 13 та қуёнчилик хўжаликларига, қолган 10,7 млрд. сўми 424 та жисмоний шахсларга ўз хонадонида қуёнчиликни ривожлантириш мақсади учун йўналтирилди. Бунинг натижасида жорий йилнинг ўтган даврида 10 та янги қуёнчилик хўжаликлари ташкил этилди.

Insta 1082.png

Мисол учун, йирик қуёнчилик фермаларидан Тошкент шаҳридаги “The best Italian Rabbits” МЧЖга қуён чиқинди қайта ишлаб чиқариш ва бошқа бинолар қурилиши учун 18,7 млрд. сўм, Қорақалпоғистон Республикасидаги “Тахтакўпир Хон Қуёнлари” МЧЖга қуёнчилик фермасини ташкил этиши учун 6,1 млрд. сўм, Фарғона вилоятидаги “Рошидонлик Умидахон Файзи” Ф/Хга Қуёнчилик комплексини қуриш учун 5,0 млрд. сўм миқдорида кредитлар ажратилган.

Амалга оширилган ишлар натижасида республика бўйича барча тоифада парваришланаётган қуёнлар бош сони 2022 йил бошига 1 630 мингтани ташкил этган бўлса, бугунги кунга келиб 2 152 минг бошга етказилди. 

Бундан ташқари, қуёнчилик соҳасини илмий асосда ривожлантириш мақсадида Қорақалпоғистон Республикаси, Наманган, Самарқанд, Қашқадарё, Фарғона ва Хоразм вилоятларида илмий-амалий семинар ўтказиш марказлари ташкил этилиб, ушбу соҳага қизиқиш билдирган тадбиркорлар ва хонадон эгаларини босқичма-босқич ўқитиш йўлга қўйилган.

Банк Ахборот хизмати