Хотин-қизлар тадбиркорлигини қўллаб-қувватлаш: Микрокредитбанкнинг натижали ташаббуслари

Сўнгги йилларда Ўзбекистонда хотин-қизларнинг ҳуқуқ ва манфаатларини ҳимоя қилиш, гендер тенгликни таъминлаш, улар учун янги иш ўринлари яратиш ҳамда тадбиркорликка жалб қилиш каби масалалар давлат сиёсати даражасига кўтарилди. Айниқса, Президентимизнинг саъй-ҳаракатлари туфайли хотин-қизлар учун янги имкониятлар эшиги очилди. Шу қаторида “Микрокредитбанк” АТБ хотин-қизлар тадбиркорлигини ривожлантириш ва молиявий қўллаб-қувватлашни ўзининг устувор вазифаларидан бири сифатида белгилаб келмоқда.

Кенг қамровли молиявий қўллаб-қувватлаш

2024 йил давомида банк томонидан ҳар бир вилоят ва туманларда янги бизнес ғояларига эга хотин-қизларни аниқлаш, уларнинг ташаббусларини амалга оширишга кўмаклашиш мақсадида жиддий ишлар олиб борилди. Хусусан, оилавий тадбиркорликни ривожлантириш дастурлари доирасида 77 752 нафар хотин-қизга 1,175 триллион сўмлик имтиёзли кредитлар ажратилди. Бу маблағлар 78 мингдан ортиқ хотин-қизнинг бандлигини таъминлашга хизмат қилди.

Шунингдек, Тикланиш ва тараққиёт жамғармаси ҳисобига ажратилган 252 миллиард сўм ресурс маблағлари орқали 19 372 нафар хотин-қиз ўз бизнесини йўлга қўйди. Масалан, Сирдарё вилоятининг Наврўз маҳалласида истиқомат қилувчи Мунира Дулонова асаларичилик соҳасида катта муваффақиятларга эришган тадбиркорлардан бири. Банк ажратган 33 миллион сўмлик кредит туфайли фаолиятини бошлаган Мунира опа кейинчалик яна 30 миллион сўмлик имтиёзли кредит орқали ишлаб чиқариш ҳажмини ошириб, 50 та асалари оиласи етиштирди.

Тарғибот ва ўқув тадбирлари Сирдарё вилояти мисолида

Банк фақат молиявий кўмак бериш билан чекланиб қолмасдан, мунтазам равишда тарғибот ва ўқув тадбирларини ўтказиб келмоқда. Хусусан, 2024 йилнинг 27 сентябрида “Микрокредитбанк” АТБ раҳбарияти Сирдарё вилоятининг Сардоба туманига ташриф буюриб, хотин-қизлар билан очиқ мулоқот ташкил қилди. Учрашув давомида тадбиркорликни қўллаб-қувватлашга оид янги маҳсулотлар ва улардан фойдаланиш тартиби бўйича маълумотлар берилди.

Сардоба туманидаги Мономарказда хотин-қизларни тадбиркорлик кўникмаларига ўргатиш ишлари юқори самара берди. Бугунги кунга келиб, ушбу туманда 900 нафарга яқин хотин-қиз касб-ҳунар, тадбиркорлик кўникмалари ва молиявий саводхонлик бўйича ўқув курсларини муваффақиятли тамомлади.

Таъкидлаш лозимки, бугунги кунда хотин-қизлар бандлигини таъминлаш бўйича амалий ишларнинг салмоғи Сардоба туманида сезиларли даражада ортди. Дастур асосида хотин-қизларни касбга ўқитиш ва бандлигини таъминлаш, уларни тадбиркорликка кенг жалб этиш бўйича ишларни мутлақо янгича ёндашувлар ва тизим асосида ташкил этилиши бўйича маҳаллалар кесимида манзилли режалар белгилаб олинди. Натижада эса бугунги кунда Сардоба туманидаги 900 нафарга яқин хотин-қизлар касб-ҳунар, тадбиркорлик кўникмалари ва молиявий саводхонликка ўқитилди.

Ана шу каби тадбирлар, очиқ мулоқотлар  Сирдарё вилоятининг Сайхунобод ва Боёвут туманларида ҳам  ташкил этилди. Банк раҳбарияти иштирокида тегишли масъул ташкилотлар билан биргаликда аёл тадбиркорлар ҳамда тадбиркорлик фаолиятини бошлаш истагида бўлган хотин-қизлар билан учраш-мулоқотлар ўтказилди. Учрашувлар давомида хотин-қизлар муаммо ва таклифлари ўрганилиб, ҳал этиш чорлари кўрилди.

Стратегик режалар

Ҳозирги кунда иқтисодиёт ва саноат тармоқларида аёллар улуши 46 фоизни ташкил этаётгани эътирофга лойиқдир. Келгуси икки йил давомида кичик ва ўрта бизнесда хотин-қизларнинг улушини 25 фоиздан 40 фоизга етказиш кўзланган. Бунда банкнинг тизимли ёндашувлари, ҳудудий мулоқотлар ва манзилли режалар асосида амалга оширилаётган ишлар ҳал қилувчи аҳамиятга эга.

Хулоса

“Микрокредитбанк” АТБнинг хотин-қизларни қўллаб-қувватлашга қаратилган ташаббуслари нафақат уларнинг иқтисодий мустақиллигини таъминлашга, балки миллий иқтисодиётга улкан ҳисса қўшишга қаратилгандир. Тадбиркорликка оид очиқ мулоқотлар, форумлар ва ўқув дастурлари орқали кўплаб аёллар ўз орзуларини рўёбга чиқармоқда. Банкнинг саъй-ҳаракатлари натижасида юзлаб хотин-қизлар ўз бизнесини бошлади ва юртимиз равнақи учун ҳисса қўшмоқда.

Банк Ахборот хизмати