Ўзбекистонда хотин-қизларнинг иқтисодий фаоллигини ошириш, тадбиркорликка кенг жалб этиш ва уларнинг бандлигини таъминлашга қаратилган ишлар изчил давом этмоқда. Айниқса, ташаббускор аёлларнинг бизнес ғояларини қўллаб-қувватлаш орқали уларнинг иқтисодий мустақиллигини таъминлаш муҳим аҳамият касб этмоқда.
Микрокредитбанк томонидан хотин-қизларни тадбиркорликка жалб қилиш мақсадида 250 та тавсиявий бизнес-лойиҳалардан иборат махсус тўплам тайёрланди. Бу тўпламлар маҳаллалар ва туман (шаҳар)ларга етказилиб, аёлларга ўз бизнес режаларини ишлаб чиқишда амалий ёрдам берадиган муҳим қўлланма сифатида фойдаланилмоқда.
Сирдарё вилоятининг турли ҳудудларида хотин-қизлар тадбиркорлиги билан боғлиқ муаммоларни ўрганиш ва ечим топиш мақсадида учрашувлар ташкил этилмоқда. Бу учрашувларда аёлларни тадбиркорликка жалб этиш, уларга зарур маслаҳат ва кўмак кўрсатиш борасида амалий ишларни ташкил этиш имконияти яратиляпти.
Микрокредитбанк Бошқарув раиси ўринбосари Шахло Ибрагимованинг Сирдарё вилоятига ташрифи доирасида Гулистон шаҳри ва Боёвут туманидаги тадбиркор аёллар билан учрашувлар ўтказилди. Уларнинг фаолияти, даромад манбалари ва келгусидаги режалари ўрганилди.
Хотин-қизларни тадбиркорликка жалб қилиш учун замонавий ечимлар ҳам жорий этилмоқда. Микрокредитбанк, Халқ банки ва Бизнесни ривожлантириш банки ҳамкорлигида ишга туширилган loyihalar-fabrikasi.uz платформаси бунинг ёрқин мисолидир. Ушбу платформада ҳудудларнинг ихтисослашувига мос тавсиявий бизнес-режалар, кредит ажратиш шартлари ва бошқа зарур маълумотлар тақдим этилади. Платформанинг иккинчи босқичида аёллар томонидан ишлаб чиқилган маҳсулотларни сотиш учун алоҳида бўлим ташкил этилиши режалаштирилган.
2024 йилда оилавий тадбиркорликни ривожлантириш дастурлари доирасида вилоятда 3 806 та аҳоли ва тадбиркорлик субъектига жами 55,3 миллиард сўм имтиёзли кредит ажратилди. Шунинг 51 фоизи, яъни 28,3 миллиард сўм, 2 220 нафар хотин-қизларнинг тадбиркорлик фаолиятини қўллаб-қувватлашга йўналтирилди. Натижада 2 200 нафардан ортиқ аёлнинг бандлиги таъминланди.
Ўзбекистон Республикаси Президентининг ПҚ-122-сонли қарорига мувофиқ, хотин-қизларни касбга ўқитиш ва тадбиркорликка жалб қилиш учун 6,7 миллиард сўм имтиёзли кредитлар ажратилди. Шунингдек, “Маврид” мобил иловаси орқали онлайн ариза топшириш имконияти яратилди.
Хотин-қизларнинг иқтисодий фаоллигини ошириш ва тадбиркорликка кенг жалб қилиш бўйича амалга оширилаётган чора-тадбирлар мамлакатда уларнинг жамиятдаги ўрнини мустаҳкамлашга хизмат қилмоқда. Тизимли ва инновацион ёндашув орқали тадбиркорлик салоҳиятини оширишга йўналтирилган саъй-ҳаракатлар аёллар ҳаётига ижобий ўзгаришлар киритиши шубҳасиз.
Қуйида Сирдарё вилоятига қилинган ташриф ва у ердаги аёлларнинг тадбиркорлик фаолияти билан танишишингиз мумкин.
Банк Ахборот хизмати
Яна кўринг
МКБАНК ходими “МЎЪТАБАР АЁЛ” кўкрак нишони билан тақдирланди!
