Жорий йилнинг 9-ноябрь, шанба куни банк ходимлари учун саёҳат туризми доирасида Янги Ўзбекистон боғи ҳамда “Чиноркент” дам олиш масканларига саёҳат уюштирилди. Унда банкда фаолият олиб бораётган 40 нафар фаол ходимлар иштирок этди.
Дастлабки манзил Мустақиллигимизнинг 30 йиллик байрами арафасида барпо этилган Янги Ўзбекистон боғи бўлди.
Бу гўзал боғда ўзбекистонликлар ва хориждан келадиган меҳмонлар яйраб дам олиши, оиласи, фарзандлари билан бирга мазмунли ҳордиқ чиқариши учун барча шароитлар яратилган. Сунъий кўл, спорт майдончалари, болалар ўйингоҳлари, амфитеатр, фавворалар, савдо ва хизмат кўрсатиш объектлари ташкил этилган.
Боғнинг марказий қисмида муҳташам бадиий обида – Мустақиллик монументи барпо этилган бўлиб, ушбу монументни яратишда Ўзбекистоннинг уч минг йиллик миллий давлатчилик тарихи акс этади. Банк ходимлари Ўзбекистоннинг қадимий тарихидан бошлаб бугунги кунга қадар юз берган энг муҳим воқеалар муҳрланган ушбу монументни томоша қилиб, боғ бўйлаб сайр қилишди.
Банк ходими Aзиза Aвлияқулова ўз таассуротлари билан бўлишаркан, шундай фикрларни билдирди: “Ўтмишдаги ютуқ ва ғалабаларидан куч-қувват олиб, хато ва мағлубиятларидан хулоса ва сабоқ чиқариб яшайдиган халқ ўзининг тараққиёт йўли ва келажагини тўғри белгилай олади. Ушбу монументда акс эттирилган ғоя бизни ўтмиш ва келажак ҳақида ўйлашга ундади. Мажмуада буюк саркарда ва жаҳонгирлар, аллома ва мутафаккирлар, жадид боболаримизнинг ўлмас сиймолари акс эттирилган. Бу масканга саёҳатимиз қалбларимизга ҳам маънавий, ҳам руҳий сокинлик бахш этди”. 
Ёдгорлик юртимизда янги Ўзбекистонни – учинчи Ренессанс пойдеворини яратиш ғояси билан уйғун ҳолда барпо қилингани, айниқса, аҳамиятлидир. Тинчлик ва эркинлик, эзгулик ва фаровонлик тимсоли бўлган, кўкда мағрур парвоз қилаётган Ҳумо қуши тасвири монументнинг энг юқори қисмида – бамисоли унинг гултожи бўлиб ўрин эгаллаган. Банк ходимлари саёҳат давомида мажмуа ҳақида барча маълумотларга эга бўлишди. 
Шундан сўнг ходимлар “Чиноркент” дам олиш маскани томон йўл олишди.
Ҳозирда жаҳоннинг турли жойларида шаҳарларни тепадан томоша қилиш имконини берадиган дор йўллари мавжуд. Бу туристлар оқимини яна ҳам оширишга хизмат қилади. “Чиноркент” тоғ комплексида ташкил этилган дор йўли орқали саёҳат ҳам банк ходимларида катта таассурот қолдирди, уларнинг кўпчилиги илк бора бу ерларга келишаётганини билдирди.
“Тоғли ҳудудлар инсон қалбини завққа тўлдиради, айниқса, уни тепадан томоша қилиш жуда мароқли, ҳам тоза ҳаводан нафас олиб, шу билан бирга мафтункор табиатнинг такрорланмас гўзаллигидан баҳраманд бўлиш қанчалар ёқимли. Бундай дам олишлар тез-тез ташкил қилинса, мақсадга мувофиқ бўлар эди” – дейди Мадина Майлиева.
Банк Aхборот хизмати
