Муҳтарам юртдошлар, азиз ҳамкорлар ва ҳамкасблар! Банкимизнинг қадрли мижозлари!
Барчангизга бугунги қутлуғ айём – Ўзбек тили байрами муборак бўлсин
Мамлакатимизда ўзбек тилини ривожлантириш, унинг ҳаётимиздаги ўрни ва таъсирини ошириш борасида янги босқич бошланди, десак, муболаға бўлмайди. Хусусан, 21 октябрь - Ўзбек тили байрами куни деб белгилангани унутилмас, тарихий воқеага айланди. Давлат тилининг нуфузи ва мақомини юксалтиришга қаратилган фармон ва қарорлар, меъёрий ҳужжатлар қабул қилинди.
Миллатнинг мавжудлиги унинг тили билан белгиланиши шубҳасиз. Тил – миллат кўзгуси дейишимизнинг сабаби ҳам шунда. Боиси, дунёда қанчадан-қанча ўз тилига эга бўлмаган, таъбир жоиз бўлса ўзга тилда сўзлашга маҳкум бўлган халқлар бор.
ЮНЕСКО маълумотларига кўра, бугунги кунда дунёда қарийб 7 мингга яқин тил мавжуд, лекин улардан фақат 200га яқинигина давлат тили мақомига эга. Шулар қаторида бугунги кунда жаҳон миқёсида 50 миллиондан ортиқ киши сўзлашиб, кўплаб мамлакатларда катта иштиёқ билан ўрганилаётган гўзал ва жозибали тил - ўзбек тилининг ҳам борлиги қалбимизни ғурурга тўлдиради. Бугунги кунда дунё мамлакатларининг 75 фоизида миллий тилни ҳимоя қилиш мақсадида тилга оид давлат сиёсати мавжуд.
Шукрки, мамлакатимизда она тилимизни асраб-авайлаш давлат сиёсати даражасига кўтарилган. Ўзбекистонда 1989 йил 21 октябрь куни қабул қилинган “Давлат тили ҳақида”ги Қонунда ўзбек тилига Давлат тили мақоми берилган. Мустақил Ўзбекистон Республикасининг 2020 йил 10 апрелдаги ЎРҚ-615-сон Қонунига асосан эса 21 октябрь мамлакатимизда Ўзбек тили байрами куни этиб белгиланди. Дунёнинг азалий ва бой тилларидан бири бўлган ўзбек тили халқимиз учун давлат мустақиллигининг рамзи, улкан маънавий қадрият ва миллий ўзлигимиз белгисига айланган.
Ушбу миллатимиз ғурури, мустақиллик белгиси бўлган "Ўзбек тили байрами" куни муносабати билан барча юртдошларимизни самимий муборакбод этамиз. Она тилимиз ҳамиша мағрур янграсин ва абадий яшасин!
Бутайев Ориф Aлибоевич
“Микрокредитбанк” AТБ Бошқарув раиси
