Ижтимоий тармоқларда “БЕГЛАМИШ-СОЙ” ишлаб чиқариш кооперацияси фаолияти, фуқароларга ажратилган кредит маблағлари ҳамда токзорларни ташкил этиш билан боғлиқ ҳолатлар юзасидан тарқалган мурожаатлар бўйича “Микрокредитбанк” АТБ қуйидагиларни маълум қилади.
2020–2021 йилларда “БЕГЛАМИШ-СОЙ” ишлаб чиқариш кооперациясининг 321 нафар аъзосига замонавий томчилатиб суғориладиган токзор ташкил этиш мақсадида жами 9,63 млрд сўм кредит маблағлари ажратилган.
Ажратилган маблағлар ҳисобидан 172 гектар ер майдонига замонавий томчилатиб суғориш тизими ўрнатилиб, узум кўчатлари экилган.
Бироқ лойиҳа доирасида токзорларни тўлиқ ташкил этиш учун зарур бўлган бетон устунлар ва симларни ўрнатиш ишлари белгиланган тартибда амалга оширилмаган. Натижада кооперация аъзоларига токзорларни белгиланган тартибда ажратиш билан боғлиқ муаммолар юзага келган.
Мазкур ҳолатлар юзасидан ҳуқуқни муҳофаза қилувчи органлар томонидан тегишли жиноят ишлари қўзғатилган ва суд жараёнлари ўтказилган.
Кооперациянинг собиқ ҳамда кейинги раҳбарлари фаолиятига ҳуқуқий баҳо берилиб, суд қарорлари асосида уларга нисбатан тегишли жазолар тайинланган.
Шу ўринда таъкидлаш лозимки, банк томонидан кредит маблағлари амалдаги тартиб ва тегишли ҳужжатлар асосида ажратилган. Кооперация фаолиятини ташкил этиш, ажратилган маблағлардан мақсадли фойдаланиш, токзорларни барпо этиш ва унинг аъзоларига ер майдонларини тақсимлаш масалалари кооперация раҳбарияти зиммасидаги мажбуриятлар ҳисобланган.
Ҳозирги кунда кооперациянинг раҳбарияти билан боғлиқ юқоридаги ҳолатлар сабабли лойиҳа доирасида фуқароларга токзорларни ажратиш масаласида муаммолар сақланиб қолмоқда.
“Микрокредитбанк” АТБ фуқароларнинг мурожаатларини инобатга олган ҳолда, мазкур масалани қонунчиликда белгиланган тартибда ўрганиш ва банк ваколатлари доирасида тегишли чораларни кўришда давом этади.
Банк фуқароларнинг қонуний манфаатларини ҳимоя қилиш, мурожаатларини кўриб чиқиш ҳамда мавжуд масалаларни қонуний йўл билан ҳал этишга кўмаклашиш тарафдоридир.
Банк Ахборот хизмати
Яна кўринг
Жамоатчилик эшитуви: 6 ойда 2 750 нафар ходим ўқитилди, 67 та хизмат текшируви ўтказилди
2026 йил май ойида Коррупцияга қарши назорат департаменти таркибида Манфаатлар тўқнашувининг олдини олиш ва харидлар устидан назорат қилиш бўлими ташкил этилди.
МКБАНК илк бор S&P Global Ratings халқаро кредит рейтингини олди
