“ЧИҒАНОҚ” ЛОЙИҲАСИНИНГ ИЛК НАМУНАСИ НАШРДАН ЧИҚДИ

Юртимизда китобхонлик маданиятини ривожлантириш ва қўллаб-қувватлашни янги босқичга олиб чиқиш, халқимизнинг маънавий-маърифий, бадиий-эстетик талабларига жавоб берадиган китобларни юксак сифат билан чоп этиш мақсади “Микрокредитбанк” ҳамда “Ижод НАШР” нашриёти томонидан “Чиғаноқ” лойиҳаси ишлаб чиқилди.

Лойиҳа доирасида бугунги ўзбек шеърияти ва насрининг кўзга кўринган навқирон вакилларининг дастлаб 5 нафар муаллифнинг (талабга қараб, давом эттирилади) китоблари банк молиявий кўмагида чоп этилиши кўзда тутилган. Муаллифлар Ўзбекистон Ёзувчилар уюшмасида таъсис этилган нуфузли таҳрир ҳайъати ҳамда банк раҳбарияти томонидан танланди. 

Жамоамиз билан халқимизга молиявий хизматлар таклиф этиш билан бир қаторда, милий адабиётимизнинг дурдона намуналарини ватандошларимизга етказиш, китобхонликни кенг тарғиб этиш, ёш ижодкорларни қўллаб-қувватлаш мақсадида ташкил этилган ушбу лойиҳа доирасидаги илк асар – Ўзбекистон Ёзувчилар уюшмаси аъзоси, шоир ва ёзувчи Фахриддин Ҳайит ижодига мансуб бўлган “Осмон ерга яқин” китоби яқинда нашрдан чиқди.

Ўзбекистон халқ ёзувчиси Исажон Султон таъкидлаганидек: “Бу китоб бир ижодкор кўз ўнгида кечаётган ҳаёт ҳақида”. Биз эса ушбу асарни ўзбек ўқувчиларига тақдим этаётганимиздан хурсандмиз. Ўйлаймизки, “Чиғаноқ”  лойиҳаси доирасида нашрдан чиқадиган асарлар халқимизга манзур бўлади. 

Банк ахборот хизмати