Банкимиз томонидан ишлаб чиқилган Mavrid мобил иловаси ижтимоий тармоқларда “Tenge Bank” бошқарув раиси ўринбосари Улуғбек Таваккалов томонидан Tenge24 мобил иловаси билан бир хил, яъни 1 га 1 кўчирилгани ҳақида пост жойланди. (https://www.facebook.com/tavakkalov).

Аввало, шуни таъкидламоқчимизки, Mavrid ва Tenge24 мобил иловаларининг ишлаб чиқувчиси ушбу соҳада етарли тажрибага эга “TUNE consulting” компанияси ҳисобланади. Ушбу компания юртимиздаги банк мобил иловаларини ишлаб чиқиб, муваффақиятга эришиб келаётган маҳаллий корхонадир.

Мазкур компания мобил иловаларда ўзлари томонидан ишлаб чиқилган дизайн ва ечимларни буюртмачи томонидан тасдиқланган намуналар асосида амалга оширади. Шунинг учун банк мобил иловалари дизайнлари элементларида баъзи ўхшашликлар бўлиши мумкин, лекин бу элементларни қўллаш у ёки бу брендни ўзида такрорламайди.

Mavrid иловаси ҳам тасдиқланган дизайн ҳамда корпоратив брендбук ранглари асосида яратилган бўлиб, Tenge24 иловасида ишлатилган дизайн элементлари намуна сифатида олинмаган. Шунингдек, иловани ишлаш жараёнлари, функциялари, арихитектураси, сервислар билан интеграцияларида бошқа ечимлар қўлланилган. Яъни камсонли тизимлар қаторида бевосита BPM (Бизнес жараёнларини бошқариш) тизими билан боғланган. Бу эса илованинг функционаллигини оширган. Ушбу фикрларимизни соҳадаги мутахассислар ҳам тасдиқлайди.

Қолаверса, Mavrid иловасидаги функционаллик бевосита Тенгебанк иловасидаги функционалликдан фарқланади. Мисол учун, Mavrid иловасида масофадан туриб, пластик картага буюртма бериш, буюртма ҳолатини кузатиш имкониятлари яратилган. Келажакда BPM тизими имкониятларидан фойдаланган ҳолда мижозларга қулайлик яратиш мақсадида кўпгина банк маҳсулотларидан онлайн фойдаланиш имкониятларини яратиш кўзда тутилган.

Бир сўз билан айтганда, Улуғбек Таваккаловнинг иддоси ҳақиқатга мос эмас. Қолаверса, 13 апрел куни ишга туширилган Mavrid иловаси мижозлар томонидан билдирилган таклифлардан келиб чиқиб, доимий такомиллаштирилиб борилишини маълум қиламиз.

Банк ахборот хизмати.