Коррупсиясиз банк: Маҳалла банкирлари ва маҳалла агентлари билан мулоқот ўтказилди

Бугун юртимизда аҳолининг ижтимоий-иқтисодий аҳволини яхшилаш, янги иш ўринлари яратиш, кичик ва ўрта бизнесни ривожлантиришга қаратилган кенг кўламли ишларда Микрокредитбанк аксиядорлик-тижорат банки ҳам фаол иштирок этмоқда.

Ана шу мақсадда “Микрокредитбанк” АТБ томонидан 10-11-июл кунлари Хоразм вилоятидаги Арда Хива мажмуасида “Банкир ва маҳалла: бир мақсад, бир йўл” номли тимбилдинг ташкил этилди.

Мазкур тимбилдинг Қорақалпоғистон Республикаси, Хоразм ва Бухоро вилоятдаги маҳалла банкирлари ҳамда агентлари учун ўқув семинари ва очиқ мулоқот ҳам ташкил этилди.

150 нафарга яқин маҳалла банкири ва маҳалла агентларини бир жойга жамлаган тадбирда Микрокредитбанк Бошқарув раиси ўринбосари Шахло Ибрагимова, бош офиснинг масʼул раҳбарлари иштирок этишди.

Биламизки, маҳалла банкирлари маҳалланинг бизнес имкониятларини ўрганади, одамлар билан гаплашиб, уларнинг ғояларини лойиҳаларга айлантиради. Аҳолини кредит олиш, қайтариш, бизнес очиш, маҳсулотини сотишга ўргатади, лойиҳаларга ҳамроҳлик қилади. Демак, бу жараёнда улардан ҳалоллик ва коррупсион ҳолатларга мурорасизлик талаб этилади.

Очиқ мулоқотда маҳалла банкирларига бўлган ишонч ортаётганлиги, буни оқлаш учун коррупсион ҳолатлардан узоқ бўлиши, ҳалоллик ваксинаси билан эмланган ходим банк ва жамият учун мас’улият билан хизмат қила олиши та’кидланди.    

Шунингдек, мулоқотда банкда қабул қилинган “Коррупсияга қарши курашиш сиёсати”, “Одоб-ахлоқ кодекси”, “Манфаатлар тўқнашувининг олдини олиш сиёсати” каби ички ҳужжатларга риоя қилиш, иш жараёнида коррупсия ва манфаатлар тўқнашуви ҳолатларига йўл қўйилмаслик юзасидан огоҳлантиришлар берилди. Тизимда коррупсия ҳолатлари ва ноқонуний ҳаракатлар ҳақида хабар бериш учун алоқа каналларимиз мавжудлиги яна бир эслатиб ўтилди.

Тадбир якунида коррупсияга қарши курашда барчамиз бирлашсак, янги Ўзбекистонда коррупсиясиз жамият пайдо бўлиши, бу йўлда МКБАНК очиқлик ва ҳалолликни таʻминлаш, жамият ишончи ва давлат сиёсатини мустаҳкамлашда доим фаол иштирок этиши алоҳида та’кидланди.

Самимий мулоқотга айланган тадбирда иштирокчилар ўзларини қизиқтирган саволларга ҳам жавоблар олишди.

Банк Ахборот хизмати