Халқаро тикланиш ва тараққиёт банки иштирокидаги «Ўзбекистон Республикасида мева-сабзавотчилик тармоғини ривожлантириш» лойиҳаси доирасида «Микрокредитбанк» АТБ ҳамда Ўзбекистон Республикаси Иқтисодиёт ва молия вазирлиги, Ўзбекистон Республикаси Қишлоқ хўжалиги вазирлиги ўртасида 19.7 миллион АҚШ доллари миқдоридаги маблағларни жалб қилиш бўйича уч томонлама қайта кредитлаш битими имзоланди.

Битим 2024 йил 14 февраль санасида имзоланган бўлиб, кредит линияси кўлами Ўзбекистон қонунчилигида белгиланган тартибда рўйхатдан ўтган жисмоний шахслар, хусусий ишлаб чиқарувчилар, фермерлар ва қишлоқ хўжалиги корхоналари каби кўплаб бенефициарларни қамраб олади.

Маблағлар қишлоқ хўжалиги, озиқ-овқат маҳсулотларини қайта ишлаш ва ишлаб чиқариш, тўқимачилик, ҳунармандчилик ҳамда агротуризм каби турли соҳалардаги суб-лойиҳаларни қамраб олган ташаббусларга йўналтирилади.

МКБАНК кўплаб соҳаларда тадбиркорлик ва инновацияларни қўллаб-қувватлаб, қишлоқ хўжалиги соҳасида мева ва сабзавотчилик бўйича янги йўналишларни ривожлантириб келмоқда. Бу орқали яхлит иқтисодий ўсиш ва янги иш ўринлари яратишга эришиш мақсад қилинган. 

Маълумот ўрнида айтиш лозимки, битим Президентимизнинг 2018 йил 20 июндаги ПҚ-3790-сонли қарорига мувофиқ соҳани жадал ривожлантиришга қаратилган ислоҳотлардан ҳисобланади.

Банк Ахборот хизмати