Паррандачилик чорвачилик соҳасининг асосий тармоқларидан бири ҳисобланади. Республикамизда паррандачиликни ривожлантиришга қаратилган эʼтибор бугун соҳа ривожига муҳим туртки бўлмоқда. Охирги йилларда Президентимизнинг бир қатор қарорлари қабул қилиниб, соҳада парранда гўшти ва истеʼмол тухуми ишлаб чиқариш салмоғи ошди.
Та’кидлаш керакки, республикада 2024-йилда аҳолининг истеʼмол тухумига бўлган талаби 115 фоизга, парранда гўштига бўлган талаби 106 фоизга таʼминланди.
Хусусан, Андижон вилоятида 58,5 минг тонна парранда гўшти ва 774 млн дона истеʼмол тухуми ишлаб чиқарилди.
Вилоятда паррандачилик йўналишида фаолият юритаётган корхоналар сони 84 тани ташкил этиб, шундан 26 таси гўшт ва 58 таси тухум йўналишидаги корхоналар ҳисобланади.
2025-йилда вилоятда парранда бош сони 11,2 млн бошга етказилиб, ўтган йилга нисбатан 102 фоизга ўсиши таʼминланади.
Жорий йилда умумий қиймати 198 млрд сўмлик 18 та лойиҳа амалга оширилиб, натижада 2,4 млн бош парранда, 141 млн дона тухум ва 1,9 минг тонна қўшимча парранда маҳсулотлари етиштириш қувватлари яратилади.
Мисол учун, Асака туманидаги “Барака ҳамкор парранда” хусусий корхонаси амалга ошираётган лойиҳа ҳисобига гўшт етиштириш қуввати 11,2 минг тоннага етказилади. Шунингдек, корхонада замонавий услубда йилига 87 минг тонна омухта-ем ишлаб чиқариш қуввати ишга туширилади.
Натижада омухта-ем сарфи 5 фоизга, электр энергия сарфи 3 баробарга ва ҳар бир килограм гўшт етиштириш таннархида газ сарфи 4 баробарга қисқаради.
Етиштирилган парранда гўшти маҳсулотлари Тожикистон, Қирғизистон, Афғонистон ва Хитой давлатларига экспорт қилиниши режалаштирилган.
Ушбу лойиҳа доирасида Микрокредитбанк ва Паррандасаноат уюшмаси Андижон Қишлоқ хўжалиги ва агротехнологиялар институти масʼуллари билан паррандачиликда назарий-амалий билимларни боғлаш ҳамда аҳоли хонадонларида парранда боқишни ташкил этиш юзасидан музокара ўтказилди. Натижада паррандачилик хўжаликларига Институт талабаларини бириктириш ва уларни “Дуал таʻлим” асосида амалиётга боғлаш механизмини яратиш бўйича келишувга эришилди.
Келишув доирасида, Институт битирувчиларини амалиёт жараёнига боғлаш ва доимий иш билан таʼминлаш мақсадида Асака туманидаги “Барака ҳамкор парранда” хусусий корхонасида дастлабки ўқув амалий семинар ташкил этилди.
Натижада Андижон Қишлоқ хўжалиги ва агротехнологиялар институти ва “Барака ҳамкор парранда” хусусий корхонаси ўртасида битирувчи талабаларни “Дуал таʻлим” асосида амалиётга бириктириш мақсадида ҳамкорлик меморандуми имзоланди.
Банк Ахборот хизмати
