Микрокредитбанк ва АКА Банк ўртасида кредит линияси жалб қилиш бўйича келишув имзоланди

Маълумки, Германия Федерал канцлери Олаф Шолс 2024 йил 15-16-сентябр кунлари Ўзбекистонга давлат ташрифи доирасида икки давлатнинг етакчи компаниялари ва банк вакиллари иштирокида қўшма учрашувлар бўлиб ўтмоқда. 

Ушбу тадбирлар доирасида Микрокредитбанк ва АКА Банк ўртасида тадбиркорларнинг лойиҳаларини узоқ муддатга молиялаштириш орқали халқаро савдо шароитида бизнесни қўллаб-қувватлаш ва ривожлантириш мақсадида шартнома имзоланди. 


Мазкур келишув Ўзбекистон ва Германия ўртасидаги бизнесни қўллаб-қувватлаш ҳамда ривожлантириш учун муҳим аҳамият касб этган ҳолда, мамлакатнинг турли соҳаларида кичик ва ўрта бизнесга қўшма кўмак кўрсатишни назарда тутади, бу эса янги иш ўринларини яратиш ва иқтисодий ўсишни рағбатлантиришга ёрдам беради. 

Бундан ташқари, ушбу келишув икки мамлакат етакчилари томонидан қабул қилинган 2024-2026 йилларга мўлжалланган Технологик ҳамкорлик ва саноат кооперацияси дастурини амалга оширишга хизмат қилади. Мазкур дастур Ўзбекистон миллий иқтисодиётини ривожлантириш, унинг юқори ўсиш суръатларини таъминлаш, инвестиция ва инновация муҳитини яхшилашга қаратилган. 


Маълумот учун: «АКА Банк» 1952 йилда Европанинг етакчи банклари консорсциуми томонидан ташкил этилган ихтисослашган молия институти бўлиб, унинг асосий мақсади — савдони ривожлантириш ва Европа товарлари ҳамда хизматларини халқаро бозорларга экспорт қилишни молиялаштиришга қаратилган. 

Банк Ахборот хизмати