2026 йил 9 июнь куни пойтахтдаги “Hilton Tashkent City” меҳмонхонасида МКБАНК томонидан “Career Event 2026” тадбири ташкил этилди. Очиқ эшиклар куни форматида ўтказилган мазкур тадбир ёшларни қўллаб-қувватлаш, уларнинг касбий ривожланишига кўмаклашиш ҳамда банк ва олий таълим муассасалари ўртасидаги ҳамкорликни мустаҳкамлашга қаратилди.
Тадбирда республикамизнинг етакчи олий таълим муассасалари вакиллари, талабалар, битирувчилар ҳамда банк соҳаси мутахассислари иштирок этди. Учрашув давомида таълим ва амалиёт интеграциясини ривожлантириш, ёш мутахассисларни меҳнат бозорига тайёрлаш ҳамда уларнинг бандлигини таъминлаш масалалари муҳокама қилинди.
“Career Event 2026” доирасида МКБАНК ва бир қатор нуфузли олий таълим муассасалари ўртасида ҳамкорлик меморандумлари имзоланди. Жумладан, MDIS in Tashkent, Қўқон давлат университети, Г.В. Плеханов номидаги Россия иқтисодиёт университетининг Тошкент филиали, Янги Ўзбекистон университети, Wебстер университети ҳамда Жаҳон иқтисодиёти ва дипломатия университети билан ҳамкорлик истиқболлари юзасидан келишувларга эришилди.
Мазкур меморандумлар талабалар учун амалиёт дастурларини кенгайтириш, таълим жараёнини амалий тажриба билан бойитиш, истиқболли ёшларни банк тизимига жалб этиш ҳамда битирувчиларнинг иш билан таъминланиш имкониятларини оширишга хизмат қилади.
Тадбир давомида талабалар ва битирувчилар МКБАНКнинг фаолияти, банк тизимидаги замонавий касблар ҳамда мавжуд вакансиялар ҳақида батафсил маълумот олдилар. Шунингдек, улар банкнинг тажрибали мутахассислари ва раҳбарлари билан бевосита мулоқот қилиш, ўзларини қизиқтирган саволларга жавоб олиш ҳамда карера ривожи бўйича тавсиялар олиш имкониятига эга бўлдилар.
Тадбирнинг муҳим жиҳатларидан бири ёшларнинг касбий салоҳиятини ривожлантириш, уларни замонавий меҳнат бозори талабларига мос мутахассис сифатида шакллантиришга қаратилган ташаббусларнинг муҳокама қилинганидир. Бу эса таълим муассасалари ва иш берувчилар ўртасидаги ҳамкорликни янада мустаҳкамлашга хизмат қилади.
МКБАНК ёшларни қўллаб-қувватлаш, уларнинг билим ва кўникмаларини ривожлантириш ҳамда малакали кадрлар захирасини шакллантириш бўйича амалга оширилаётган ишларни изчил давом эттиради. Банк келгусида ҳам таълим муассасалари билан самарали ҳамкорликни кенгайтириб, ёшлар учун янги имкониятлар яратишга алоҳида эътибор қаратади.
Банк Ахборот хизмати
Яна кўринг
МКБАНК “ZAAMIN ULTRA” 2026да!
МКБАНКдан — Онлайн Эскроу хизмати!
Эндиликда мижозлар банк бўлимларига ташриф буюрмасдан туриб, масофадан эскроу ҳисобварағини очишлари ва уни бошқаришлари мумкин.
