Бугун 18 ноябрь – Ўзбекистон Республикасининг Давлат байроғи қабул қилинган кун муносабати билан “Микрокредитбанк” АТБда ҳам банк ходимлари иштирокида маданий-маърифий тадбир бўлиб ўтди.
Маълумки, ҳар бир мамлакатнинг суверенитети ва мустақиллигини ифодаловчи муқаддас тимсоллари бўлади. Давлат рамзлари деб аталмиш ушбу муқаддам тимсолларга эга бўлиш учун, уни душман қўлига топширмаслик мақсадида тарихда жангу жадаллар бўлган. Давлат рамзлари азал-азалдан аждодлар томонидан муқаддас тимсол сифатида ҳамиша кўз қорачиғидай асраб-авайлаб келинган.
Ана шундай рамзлардан бири мамлакатимизнинг давлат байроғидир. Доимо ўзбек халқининг шон-шарафи ва ғуруридек юксакларда ҳилпираб турган байроғимиз 1991 йил 18 ноябрда Ўзбекистон Республикаси "Давлат байроғи тўғрисида”ги қонуни қабул қилинган кундан бошлаб давлат суверенитетининг рамзига айланди ва шу кундан бошлаб, байроғимиз Ўзбекистон делегацияларининг хорижий мамлакатларга сафарлари чоғида, давлатимизнинг чет эллардаги элчихоналари ва халқаро ташкилотлардаги ваколатхоналарида, халқаро конференцияларда, жаҳон кўргазмаларида, спорт мусобақаларида, юртимиздаги барча расмий идораларда озод ва обод Ватанимиз тимсоли сифатида юксакларда парвоз қилмоқда.
Шайх Нажмиддин Кубронинг жасоратини тарихдан яхши биламиз. Одатда, байроғимиз қабул қилинган кун муносабати билан ўтказиладиган катта- кичик тадбирлардаги маърузаларда, ОAВ ва ижтимоий тармоқлардаги чиқишларда буюк бобомиз Нажмиддин Кубро жасорати эсланади.
Манбаларда айтилишича, Нажмиддин Кубро оғир ярадор ҳолида босқинчилар байроғини ғаним яловбардори қўлидан юлқиб олади. Бу аслида, душман учун оғир зарба эди. Бир муддат мўғуллар довдираб қолишади, чунки байроқнинг туширилиши мағлубиятдан дарак эди. Ёғийлар шайхнинг устига ташланишиб, байроқни унинг қўлидан тортиб олмоққа интиладилар, аммо бу иш осон кечмагани афсонага айланиб кетганки, ҳозирда ҳам шу гаплар оғиздан-оғизга кўчиб юради...
Бу ҳақда тадбир иштирокчиларига маълумотлар тақдим этилиб, улар билан байроғимизнинг қадри ва фахримиз эканлиги тўғрисида суҳбатлашилди. Шунингдек, тадбир давомида банк ходимлари ўртасида танлов ўтказилди. Танловда тадбир иштирокчилари ўзларига ажратилган “саноқли предметлар” (қоғоз, ручка ва қалам) асосида давлат байроғининг расмини чегараланган вақтда чизиб беришлари керак эди. Самимий ва ходимлар учун кутилмаган тарзда ўтган тадбирда ғолиблар овоз бериш орқали аниқланиб, банкнинг эсдалик совғалари билан тақдирланишди.
Давлат рамзлари ҳамиша муқаддас ва улуғ саналади. Чунки у халқнинг ўтмиши, бугуни ва келажагини ўзида мужассам этган Ватаннинг ёрқин тимсолидир.
Байроғимизнинг баландлиги юртимизнинг обрў-нуфузи юксаклигидан далолатдир. Шундай экан, сарбаланд қаддимиз ва қадримиз тимсолини ҳамиша эъзозлайлик ва бошимиз узра баланд кўтарайлик!
Банк Ахборот хизмати
Бошқа янгиликлар
МКБАНК 1/8 финалига йўл олди!
