Маълумки, Давлатимиз раҳбарининг жорий йилнинг май ҳамда сентябр ойларида Германияга ташрифи давомида банк молия соҳасида, шу жумладан, Германиянинг “Deutsche Bank”, “Commerzbank”, “KfW” ва “Landesbank” каби энг йирик банклари билан лойиҳаларни молиялаштириш борасидаги ҳамкорликни кенгайтириш бўйича муҳим келишувларга эришган эди.
Ушбу учрашувнинг мантиқий давоми сифатида жорий йилнинг 9-12 октябрь кунлари “Микрокредитбанк” АТБ ходимларидан иборат делегация Германияда бўлишди. Мазкур сафар давомида бир қатор келишувларга эришилиб, хорижий тажриба билан яқиндан танишишди.
Банк Бошқаруви Раиси ўринбосари, департамент директорлари ҳамда ҳудудий филиал раҳбарларидан иборат делегация дастлаб, Баден-Вюрттемберг шпаркассалари ассоциациясига (SVBW) ташриф буюришди. Ассоциация раҳбари томонидан филиал тизимлари ва уларни қайта тартибга солиш, рақамли банкинг, мижозларни сегментациялаш, ихтисослашувлар мавзуларида семинар ўтказилди.
Шунингдек, Шпаркассалар академияси фаолияти билан танишиб, Академия раҳбари Арнольд ва бошқа раҳбар ходимлар Шпаркассаларнинг умумий ўқитиш ва малака ошириш тизими билан танишилди. Хизматларни сотиш соҳасида махсус таълим йўллари ва таклифлари, сотув йўналишлари бўйича ҳам семинар ўтказилди.
Делегация аъзолари Ландсбанк (Landesbank Baden-Württemberg (LBBW)) фаолияти билан яқиндан танишиш имкониятига ҳам эга бўлишди. Банкнинг савдони молиялаштириш ва тўловлар бўйича Бош директори Thomas Lehmpuhl (Managing Director, FI Trade Finance & Payments Services), Савдони молиялаштириш ва тўловлар бўйича директорлар Irina Rausch (Director, FI Trade Finance & Payments Services) ва Elvira Petrik (Director, FI Trade Finance & Payments Services) лар билан очиқ мулоқот тарзда фикр алмашилди.
Учрашув давомида, Микрокредитбанк АТБ Бошқарув раиси ўринбосари Иброхим Мамаджанов банк ва банкнинг асосий молиявий кўрсаткичлари тўғрисида маълумот берди. Шунингдек, томонлар ўзларини қизиқтирган саволларга жавоблар олишди.
Учрашув якунига кўра, Ландсбанк ва Микрокредитбанк ўртасида узоқ муддатли молиявий ресурсларни жалб қилиш, хорижий валютадаги вакиллик ҳисобварақларини очиш ҳамда бошқа йўналишларда ўзаро ҳамкорлик қилиш бўйича дастлабки келишувга эришилди.
Бундан ташқари делегация аъзолари Баден-Вюрттемберг ҳудудидаги Ludwigsburg (Kreissparkasse Ludwigsburg) ва Tübingen (Kreissparkasse Tübingen) шаҳарларида жойлашган Шпаркасса филиаллари фаолияти билан ҳам яқиндан танишишди.
Мазкур филиалларда мижозларни қабул қилиш, улар билан учрашувлар ташкил этиш, маслаҳатлар бериш, банк маҳсулотларини мижозларга сотиш йўналишлари, авваламбор филиалда сотувнинг янгича ташкил этилиши ҳамда рақамли банк хизматлари кўрсатиш, тегишли маркетинг ишларини ташкил этилганлиги, “Алоқа марказ” фаолияти ва бошқа йўналишлар бўйича хизмат кўрсатиш жараёнлари ҳақида маълумотларга эга бўлишди.
Қисқача айтганда, Микрокредитбанк АТБ ходимлари Германияга қилган сафари давомида ўзаро тажриба алмашиш, янги билим ва кўникмаларни ўзлаштириш, умуман олганда Баден-Вюрттемберг ҳудуди Шпарккассалари амалиётида қўлланилаётган илғор банк хизматлари билан яқиндан танишиб қайтишди. Ушбу замоанавий банк тажрибаларини амалиётда қўллаш бўйича аниқ чора-тадбирларни белгилаб олинди.
Банк Ахборот хизмати
Бошқа янгиликлар
