Qashqadaryo viloyatidagi “Choʼl parrandasi” MJCHga press-tur tashkil etildi

Parrandachilik chorvachilikning serdaromad, serpusht va tez yetiluvchan tarmogʼi hisoblanadi. U xalqimizga koʼplab sifatli parhez taom — tuxum va parranda goʼshti yetkazib berishda katta ahamiyatga ega. 

Parranda goʼshti tez hazm boʼlish xususiyatiga koʼra barcha turdagi chorva mollari goʼshtidan ustun turadi. Tarkibi har xil kimyoviy elementlarga boy.

 Bugungi kunda parrandachilik istiqbolli va chorvachilikdagi asosiy yoʼnalish ekani tan olinadi. Buning sabablardan biri parrandalarni saqlash uchun inshootlarning oddiy boʼlishidir. Tahlilchilarning fikricha, bugungi kunda jahonning yetakchi davlatlarida parrandachilikka katta eʼtibor qaratilmoqda. Chunki aynan parrandachilik aholini oziq-ovqat mahsulotlari bilan taʼminlanishida asosiy ahamiyat kasb etib, qishloqlarda odamlarning ish bilan band boʼlishiga katta hissa qoʼshadi. 

Shu jihatdan olib qaraganda, mamlakatimizda parrandachilikni rivojlantirishga alohida eʼtibor qaratilib, buning uchun zarur huquqiy asoslar yaratilayotgani diqqatga sazovor. Jumladan, Prezidentimizning «Parrandachilik sohasini davlat tomonidan qoʼllab-quvvatlash tizimini yanada takomillashtirish chora-tadbirlari toʼgʼrisida»gi Qarori eʼtiborga molik. Qarorga koʼra 2022-yil 1-iyundan 400 mlrd. soʼmgacha kredit mablagʼlari hisobidan parrandachilik xoʼjaliklari va parranda omuxta yemi ishlab chiqaruvchi tadbirkorlarga don zaxirasi yaratish uchun 3 oylik imtiyozli davr bilan 12 oygacha revolver kreditlar ajratiladi. 

 Shuningdek, qarorda parrandachilikni rivojlantirish boʼyicha maqsadli davlat dasturlari boʼyicha kredit mablagʼlari 10 yilgacha muddatga 3 yilgacha imtiyozli davr bilan ajratilishi ham belgilangan. 

Аytish joizki, «Mikrokreditbank» tomonidan qaror bilan belgilangan vazifalar ijrosini taʼminlash maqsadida bir qator chora-tadbirlar amalga oshirilmoqda. Xususan, 2021-yil 29-iyunda Tiklanish va taraqqiyot jamgʼarmasidan 529,2 mlrd. soʼm (1-bosqich: 50 million АQSh dollari) miqdorida mablagʼlar ajratilgan edi. Ushbu mablagʼlar hisobidan 203 ta parrandachilik xoʼjaliklari va ozuqa-em mahsulotlarini ishlab chiqaruvchi korxonalarga 500,8 mlrd. soʼm miqdorida kredit mablagʼlari ajratildi. Shundan, qarorga asosan boshqa tijorat banklariga parrandachilik loyihalarini moliyalashtirgani uchun jami 95,8 mlrd. soʼmlik resurs mablagʼlari yoʼnaltirildi. Xususan, Qishloqqurilishbankka 10 ta loyihaga 29,8 mlrd. soʼm, Turonbank 2 ta loyihaga 11,5 mlrd. soʼm, Ipotekabank 4 ta loyihaga 52,3 mlrd. soʼm va Savdogarbankka 1 ta loyihaga 2,2 mlrd. soʼm oʼtkazib berildi. Buning hisobiga ushbu parrandachilik xoʼjaliklarida quvvatdan foydalanish 45 foizdan 80 foizga oshirilib, 410 mln. dona tuxum, 15,4 ming tonna goʼsht, 106,7 ming tonna ozuqa ishlab chiqarish imkoni yaratildi. Jumladan, Qashqadaryo viloyatida 2022 yilda qiymati 13 mlrd. soʼmlik 15 ta loyiha amalga oshirilgan boʼlib, ushbu parrandachilik korxonalarida 477 ming bosh parranda boqilmoqda. Natijada yiliga 41 mln. dona tuxum va 2,1 ming tonna parranda goʼshti yetishtirish quvvatlari yaratildi, qoʼshimcha 187 ta yangi ish oʼrin yaratildi.

 Joriy yilning 27-oktabr kuni “Mikrokreditbank” АTB hamda “Parrandasanoat” uyushmasi tomonidan Qashqadaryo viloyati Nishon tumanida joylashgan tadbirkor Baxriddin Niyazov rahbarlik qilayotgan “Choʼl parrandasi” MJChda bir guruh respublika va mahalliy ommaviy axborot vositalari vakillari uchun press-tur tashkil etildi.

    Press-tur davomida OАV vakillari parranda goʼshti (broylel tovuqlari)ni koʼpaytirish jarayoni bilan bevosita yaqindan tanishish imkoniga ega boʼlishdi.

 “Choʼl parrandasi” MChJ haqida maʼlumot 

Nishon tumanida joylashgan “Choʼl parrandasi” MJCh 2021 yilning dekabrь oyida “Mikrokreditbank” АTBning Yangi Nishon filialidan 4 yil muddatga 6 oylik imtiyozli davr bilan (14 foizli) 3 milliard soʼmlik kredit olib, oʼz faoliyatini boshlagan va shu kungacha 120 ming dona broylel joʼjalarini aholi isteʼmoli uchun yetkazib bergan. Аyni paytda mazkur korxonada 40 ming dona joʼja parvarishlanmoqda. Taʼkidlash joizki, bank tomonidan parrandachilik yoʼnalishda loyihalarni moliyaviy qoʼllab-quvvatlash borasidagi ishlar izchil davom ettirilmoqda. 

Bank axborot xizmati