“Mikrokreditbank” ATB xalqaro hamkorlikni yanada rivojlantirish va mijozlarga ko‘rsatilayotgan xizmatlar sifatini oshirish maqsadida, 2025-yil 2-oktabr kuni yevro (EUR)da AQShning yetakchi moliyaviy instituti BNY Mellon bankida navbatdagi korrespondentlik hisob raqamini ochdi.
Mazkur hisob raqamning ochilishi bank faoliyatida muhim bosqich bo‘lib, u bir qator imkoniyatlarni taqdim etadi:
Xalqaro hisob-kitoblarda qulaylik: EUR hisob raqami orqali boshqa davlatlardagi o‘zaro to‘lovlar yanada tezkor va samarali tarzda amalga oshiriladi.
Savdo-iqtisodiy aloqalarni kengaytirish: Yevroda hisob-kitoblar O‘zbekistonning xorijiy davlatlar bilan savdo-iqtisodiy hamkorligini rivojlantirishga xizmat qiladi.
Mijozlar uchun qo‘shimcha imkoniyatlar: Yuridik va jismoniy shaxslarga xalqaro moliyaviy xizmatlardan foydalanishda yangi qulayliklar yaratiladi, bu esa ularning biznes faoliyatini yanada kengaytiradi.
Bankning xalqaro nufuzini oshirish: Ushbu qadam “Mikrokreditbank” ATBning xalqaro moliya bozorida raqobatbardoshligini mustahkamlash hamda dunyoning yirik moliyaviy institutlari bilan hamkorlik aloqalarini kengaytirishga xizmat qiladi.
“Mikrokreditbank” ATBning yevroda korrespondentlik hisob raqami ochilishi bank mijozlariga global moliya tizimida yanada keng imkoniyatlarni taqdim etishi bilan bir qatorda, mamlakatimiz moliya sektorining xalqaro integratsiyasini ham kuchaytiradi.
Eslatib o‘tamiz, “Mikrokreditbank” ATB ilk bor 2025-yilning mart oyida BNY Mellon bankida AQSh dollari (USD)da, shuningdek 2025-yilning avgust oyida Xitoy yuani (CNY)da korrespondentlik hisob raqamini ochgan edi.
Hozirda “Mikrokreditbank” ATB ODDO BHF (Germaniya), Aktif Yatirim Bankasi A.S. (Turkiya) kabi ko‘plab xalqaro banklarda AQSh dollari (USD), yevro (EUR) va boshqa valyutalarda korrespondentlik hisoblariga ega.
Bank Axborot xizmati
Yana ko‘ring
MKBANK: Korrupsiyani birgalikda to‘xtataylik!
