Ma’lumki, yurtimizda va dunyoda har yili 25 noyabr – Xotin-qizlarga nisbatan zo‘ravonlikka barham berish xalqaro kunidan boshlab 10 dekabr – Inson huquqlari kuniga qadar dunyo bo‘ylab «Gender asosidagi zo‘ravonlikka qarshi 16 kunlik faollik» global kampaniyasi o‘tkaziladi.
Mazkur tashabbus doirasida joriy yil BMT tomonidan kampaniya «Xotin-qizlarga nisbatan raqamli zo‘ravonlikka barham berish uchun birlashaylik» mavzusida tashkil etilmoqda. Ana shunday xalqaro targʻibot kampaniyasi va faollik doirasida MKBANKda ham Xotin-qizlarga nisbatan zo‘ravonlikka barham berish xalqaro kuni munosabati bilan “Gender asosidagi zo‘ravonlikka qarshi 16 kun faollik” va “Ayollar va qizlarga nisbatan raqamli zoʻravonlikka barham berish uchun birlashaylik” mavzularidagi davra suhbati tashkil etildi.
Tadbirda Oila va xotin-qizlar qo‘mitasi Oilada huquqiy madaniyatni oshirish, ular о‘rtasida huquqbuzarliklar profilaktikasini tashkil etish, tazyiq va zо‘ravonlikning oldini olish bо‘limi boshlig'i — Sobirova Shoira Saloxiddinovna, Toshkent shahar Mirobod tumani IIO FMB XPB xotin-qizlar masalalari bo‘yicha katta inspektorlari — mayor Gavhar Gulyamova, leytenant Dildora Mirsobitova va bank xodimlari ishtirok etishdi.
Tadbirni “Mikrokreditbank” ATB Boshqaruv raisi oʻrinbosari Sodir Meliboyev ochib, xotin-qizlarni har qanday zo‘ravonlikdan, xususan, raqamli makondagi tahdidlardan himoya qilish bo‘yicha yurtimizda olib borilayotgan ishlarga to‘xtalib, zo‘ravonlikka qarshi kurash uzluksiz jarayon ekanini qayd etib o‘tdi.
Spikerlarning yurtimizda raqamli zo‘ravonlikka qarshi kurashish borasida olib borilayotgan ishlar, qonun loyihalari, himoya orderi va uni olish tartibi borasidagi ma’lumotlari xodimlarda qiziqish uyg‘otdi. Tadbirda xotin-qizlarni har qanday zo‘ravonlikdan, xususan, raqamli makondagi tahdidlardan himoya qilish muhim ekanligi ta’kidlandi.
Ochiq va samimiy suhbat tarzida o‘tgan tadbir davomida xodimlar o‘zlarini qiziqtirgan savollarga javob olishdi. Shuningdek, IIV media markazi tomonidan tayyorlangan ijtimoiy rolikni ham tomosha qilishdi.
Bank Axborot xizmati
Yana ko‘ring
MKBANK tizimida texnik ishlar olib borilmoqda!
Xalqaro o'tkazmalar uchun bankka kelish shart emas!
