“Mikrokreditbank” ATB O‘zbekistonda birinchi bo‘lib MIGA kafolati ostida xalqaro investitsiyalarni jalb qildi.
“Mikrokreditbank” ATB O‘zbekiston bank sektori tarixida muhim voqeani amalga oshirdi. Bank mamlakatimizda birinchi bo‘lib Jahon banki guruhiga kiruvchi Xalqaro investitsiyalar kafolati agentligi (MIGA) kafolati ostida Germaniyaning ODDO BHF SE bankidan 50 million AQSh dollari miqdoridagi mablag‘larni muvaffaqiyatli jalb qildi.
MIGA tomonidan taqdim etilgan ma’lumotlarga ko‘ra, ushbu tranzaksiya tuzilmasi nafaqat O‘zbekiston bank sektori, balki Markaziy Osiyo bank sektorida ham birinchi hisoblanadi.
Mazkur bitim O‘zbekiston bank tizimining xalqaro moliya institutlari va yetakchi xorijiy banklar bilan hamkorligini yanada mustahkamlashga xizmat qiladi hamda mamlakatimiz moliya bozoriga bo‘lgan ishonchning yuqori ekanligini yana bir bor tasdiqlaydi.
Jalb qilingan mablag‘lar kichik va o‘rta biznes subyektlarini moliyaviy qo‘llab-quvvatlash, ayollar tadbirkorligini rivojlantirish, shuningdek “yashil” va ekologik barqaror loyihalarni moliyalashtirishga yo‘naltiriladi. Ushbu tashabbuslar tadbirkorlik faoliyatini kengaytirish, yangi ish o‘rinlari yaratish hamda barqaror iqtisodiy o‘sishni ta’minlashga xizmat qiladi.
“Mikrokreditbank” ATB tomonidan amalga oshirilgan mazkur bitim bankning xalqaro moliya bozorlaridagi nufuzini oshirish, xorijiy investorlar bilan uzoq muddatli hamkorlikni rivojlantirish va ilg‘or xalqaro moliyaviy mexanizmlarni joriy etish yo‘lidagi muhim qadamlardan biri hisoblanadi.
Bank kelgusida ham xalqaro moliya institutlari va yetakchi xorijiy banklar bilan hamkorlikni kengaytirish orqali O‘zbekiston iqtisodiyotining ustuvor yo‘nalishlarini moliyalashtirishga munosib hissa qo‘shishni davom ettiradi.
Bank Axborot xizmati
Yana ko‘ring
Davlat ijtimoiy sug‘urtasi tizimida yangilik
Bank kartangiz yoningizda yo‘q, lekin naqd pul kerakmi?
